މި މަހުގެ 16 ވާ ހޮނިހިރު ދުވަހު ބޭއްވުމަށް އީސީން ހަމަޖައްސާފައި ވަނީ ހއ. ކެލާ، ނ. މާފަރާއި އދ. ހަންޏާމީދޫ ކައުންސިލް މެންބަރު އިންތިހާބު ކުރުމަށް ބާއްވާ ބައި-އިލެކްޝަނުގެ އިތުރުން ނ. މާފަރު އަންހެނުންގެ ތަރައްގީއަށް މަސައްކަތްކުރާ ކޮމިޓީގެ ބައި-އިލެކްޝަނެވެ.
މި ބައި-އިލެކްޝަންތަކުގައި ވޯޓު ދިނުމުގެ ހައްގު ލިބިފައިވާ މީހުންގެ ފައިނަލް ލިސްޓު އެ ކޮމިޝަނުން ވަނީ މިހާރު އާންމުކޮށްފަ އެވެ. އީސީން އާންމުކޮށްފައިވާ ލިސްޓުތައް ދައްކާ ގޮތުގައި، މި ހަތަރު ބައި އިލެކްޝަނުގައި ޖުމްލަ 3،144 މީހުނަށް ވޯޓުލުމުގެ ހައްގު ލިބިގެންވެ އެވެ.
އެ ކޮމިޝަނުން މި ބައި-އިލެކްޝަންތައް ބާއްވަން ނިންމާފައިވަނީ އެ މަގާމު ތަކުގައި ތިބި މެންބަރުން އިސްތިއުފާ ދެއްވުމާ ގުޅިގެންނެވެ.
ވޯޓުލުމުގެ ހައްގު ލިބިގެންވާ މީހުންގެ ލިސްޓު ދިވެހި ސަރުކާރުގެ ގެޒެޓުންނާއި ކޮމިޝަނުގެ ވެބްސައިޓުގައި އާންމުކޮށް ފެންނަން ހުންނާނެ ކަމަށް އީސީން މައުލޫމާތުދެ އެވެ.
އީސީން ބާއްވާ އިންތިހާބުތަކުގައި ވޯޓުލުމުގެ ހައްގު ލިބޭނީ، އެ އިންތިހާބެއް އޮންނަ ތާރީހަށް 18 އަހަރު ފުރިފައިވާ ފަރާތްތަކަށެވެ.
