އެމްއެންޑީއެފުން ބުނި ގޮތުގައި އެ ބޯޓު ފަރަށް އެރި އިރު އޭގައި 10 ފަޅުވެރިންނާއި ހަ އަންހެނުންގެ އިތުރުން ހަ ކުޑަކުދިން ތިބި ކަމުގަ އެވެ.

ޖުމްލަ 58 މީހުންނާ އެކު ދަތުރުކުރަމުން ދިޔަ "ބަހާދަރު" ބޯޓު، ނ. ދެކަނަންފަރު ކައިރިން ފަރަކަށް އަރައިގެން އުޅޭ ކަމުގެ މައުލޫމާތު އެމްއެންޑީއެފް ނޮދަން އޭރިއާ ކޮމާންޑް، ކޯސްޓްގާޑް ފަސްޓް ސްކޮޑްރަންއަށް ލިބުނީ ރޭ ދަންވަރު 02:30 ހާއިރު ކަމަށާއި އެ އާއެކު އެ ބޯޓުން ދަތުރުކުރި މީހުންނަށް އެހީތެރިކަން ފޯރުކޮށްދިނުމުގެ މަސައްކަތް ފެށި ކަމަށް އެމްއެންޑީއެފުން ބުނެ އެވެ.

އެގޮތުން ބޯޓު އޮތް ސަރަހައްދަށް އެމްއެންޑީއެފް ނޮދަން އޭރިއާ ކޮމާންޑް، ކޯސްޓްގާޑް ފަސްޓް ސްކޮޑްރަންގެ ހާބާކްރާފްޓް 116 ވަނީ ގޮސްފަ އެވެ. އެމްއެންޑީއެފުން ބުނެފައި ވަނީ ބޯޓު އޮތް ސަރަހައްދަށް ގޮސް، ބޯޓުގައި ތިބި މީހުންގެ ތެރެއިން 17 މީހުން މިއަދު ހެނދުނު 06:08 ހާއިރު ވަނީ ހާބާކްރާފްޓުގައި ށ. ކޮމަންޑޫއަށް ގެންގޮސްދީފައި ކަމަށެވެ.