ރައީސް އޮފީހުގެ އަންޑަރ ސެކްރެޓެރީ ފޮރ ޕަބްލިކް ޕޮލިސީ މުހައްމަދު ފިރުޒުލް އަބްދުﷲ ހަލީލް މިއަދު ވިދާޅުވީ ޑްރަގް ކޯޓުން ފަރުވާއަށް ހުކުމްކޮށްފައިވާ 700 ފަރާތަކަށް އަމާޒުކޮށް "އޮޕަރޭޝަން ފަނާރު"ގެ ނަމުގައި ފަރުވާގެ ހާއްސަ ޕްރޮގްރާމެއް ފަށަން ނިންމާފައިވާ ކަމަށެވެ.
ފިރުޒުލް ވަނީ މަސްތުވާތަކެއްޗާ ގުޅޭގޮތުން ސަރުކާރުގެ ސްޓޭންޑް ބަދަލުވެފައިވާކަން ހާމަކުރައްވާފަ އެވެ.
ނަމަވެސް, އަދިވެސް ސަރުކާރުން އެންމެ ބޮޑު ސަމާލުކަމެއް ދޭނީ މަސްތުވާތަކެއްޗާ ގުޅޭ ގޮތުން ފަރުވާ ލިބެންޖެހޭ ފަރާތްތަކަށް ފަރުވާ ދިނުމަށް ކަމަށް ފިރުޒުލް ވިދާޅުވި އެވެ.
މީގެ ކުރިން ވެސް މަސްތުވާތަކެތިން ސަލާމަތްވުމަށް ރިހެބިލިޓޭޝަން ޕްރޮގްރާމްތައް ހިންގާފައިވެ އެވެ. ކުރީ ސަރުކާރުން ވަނީ އެކަމަށް ހާއްސަ ސެންޓަރުތައް ވެސް ގާއިމްކޮށްފަ އެވެ. އެކަމަކު އެކަށީގެންވާ ފަރުވާ ނުލިބޭ ކަމުގެ ޝަކުވާ އަބަދުވެސް އޮވެ އެވެ.
މިދިޔަ ސަރުކާރުގައި ނޭޝަނަލް ޑްރަގް އޭޖެންސީ (އެންޑީއޭ) އޮތީ ހެލްތު މިނިސްޓްރީގެ ދަށުގަ އެވެ. ރައީސް ޑރ. މުހައްމަދު މުއިއްޒު ވެރިކަމާ ހަވާލުވެވަޑައިގަތުމަށްފަހު މަސްތުވާތަކެތީގެ ފަރުވާ ދޭ އެންޑީއޭ ވަނީ ހޯމްލޭންޑް ސެކިއުރިޓީ މިނިސްޓްރީގެ ދަށަށް ބަދަލުކޮށްފަ އެވެ.
