ހުރަވީ ދުވަހާ ގުޅިގެން ރޭ ސޯޝަލް ސެންޓަރުގައި ބޭއްވި ޖަލްސާގައި ވާހަކަ ދައްކަވަމުން ވަޒީރު ވިދާޅުވީ ހުރަވީ ދުވަހަކީ ދިވެހި ދައުލަތުގެ ދިފާއުގައި ކުރި މަތިވެރި ޖިހާދުގައި ދިވެހިންނަށް ނަސްރު ލިބުން ދުވަސް ކަމަށެވެ. ހުރަވީ ދުވަހަކީ ދައުލަތުގެ ދިފާއުގައި ކުރި މަތިވެރި ޖިހާދަކުން ނަސްރު ލިބުނު ދުވަސް ކަމަށާއި މި ހާދިސާއަށް މީލާދީ ގޮތުން 270 ވަރަކަށް އަހަރުވެފައިވާ ކަމަށް ވަޒީރު ފާހަގަކުރެއްވި އެވެ.
މި ސަރަހައްދުގައި އޮތް އެންމެ ދުވަސްވީ ދައުލަތަކީ ދިވެހި ދައުލަތްކަން ފާހަގަކުރައްވާ ވަޒީރު ވިދާޅުވެފައި ވަނީ ދުނިޔޭގެ ތާރީހަށް ނަޒަރުހިންގާއިރު ޒަމާންތަކެއް ވަންދެން މެދުނުކެނޑި ވެރިކަން ކުރި ރަށްރަށުގެ ތެރޭގައި ދިވެހިރާއްޖޭގެ މާލެ ހިމެނޭ ކަމަށެވެ.
ދިވެހިންނަކީ އަމިއްލަ ފައިމައްޗަށް ތެދުވެ ތިބި އަމިއްލަ ހަޟާރަތެއްގެ ވެރި ބައެއް ކަމަށް ވަޒީރު ވިދާޅުވި އެވެ. ވަޒީރުގެ ވާހަކައިގައި ވަނީ ގައުމިއްޔަތު ދިރުވާ އާލާކުރުމަށް ރައީސް ޑރ. މުހައްމަދު މުއިއްޒު ކުރައްވަމުން އަންނަ މަސައްކަތްޕުޅުތަކަށް ޝުކުރު އަދާކުރައްވާފަ އެވެ.
ކޮންމެ އަހަރެއްގެ ޖުމާދަލްއާހިރާ މަހުގެ ތިން ވަނަ ދުވަސް ފާހަގަކުރަނީ ރާއްޖޭގެ ހުރަވީ ދުވަހުގެ ގޮތުގަ އެވެ. މި ދުވަސް ފާހަގަކުރަމުން އަންނަނީ ދިވެހި ގައުމުގެ އެންމެހާ އަބްތޯލުންގެ ޒިކުރާ އާކޮށް، އެ ފަރާތްތަކުން ގެނެސްދެއްވި މިނިވަންކަމާއި ގައުމިއްޔަތު ދެމެހެއްޓުމުގެ އަޒުމާއި ޖޯޝް ދިވެހި ހިތްތަކުގައި ދިރުވާ ދެމެހެއްޓުމުގެ ގޮތުންނެވެ.
