Advertisement

ސުނާމީ ކާރިސާގައި ލިބުނު ގެއްލުންތަކުން އަރައިގަތުމަށް 592 ފަރާތަކަށް ދޫކޮށްފައިވާ ލޯން މައާފްކޮށްދެއްވައިފި އެވެ.

ސަރުކާރުގެ ފަރާތުން މިކަން އިއުލާންކޮށްދެއްވީ ސުނާމީ ކާރިސާއާ ގުޅިގެން މިއަދު ފާހަގަކުރާ އެއްބައިވަންތަކަމުގެ ދުވަހުގެ މުނާސަބަތުގައި ތ. ވިލުފުށީގައި މިއަދު ބޭއްވި ރަސްމިއްޔާތުގެ ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހް އެވެ.

ރައީސް ސޯލިހް ވިދާޅުވީ ސުނާމީ ކާރިސާއަށް މިއަދު 15 އަހަރު ފުރޭއިރު ސުނާމީގައި އެކިއެކި ފަރާތްތަކަށް ލިބިފައިވާ ގެއްލުންތައް ހައްލުކޮށްދިނުމަށް ނިމިގެން ދިޔަ ހުރިހާ ސަރުކާރަކުން ވެސް މަސައްކަތް ކޮށްފައިވާ ކަމަށެވެެ. ނަމަވެސް އެމަނިކުފާނު ވެރިކަމާ ހަވާލުވެވަޑައިގެންނެވިއިރު ވެސް ބައެއް މައްސަލަތައް މުޅިން ހައްލު ނުވެ ހުރި ކަމަށްވެސް ވިދާޅުވި އެެވެ. އެގޮތުން ސުނާމީއާ ގުޅިގެން ލިބުނު ގެއްލުންތަކުން އަރައިގަތުމަށް ބައެއް ފަރާތަކަށް ދޫކޮށްފައިވާ ލޯންގެ މައްސަލައާއި އަލުން އާބާދުކުރަން ޖެހުނު ބައެއް ރަށްތަކުގެ ގޭބިސީތަކުގެ ރަޖިސްޓްރީގެ މައްސަލަ ހައްލު ނުވެ އޮތް ކަން ރައީސް ފާހަގަކުރެއްވި އެވެ.

ލޯންތަކުގެ މައްސަލަ ފާހަގަކުރައްވަމުން ރައީސް ވިދާޅުވީ ސުނާމީ ލޯންގެ ގޮތުގައި 592 ފަރާތަކަށް ދޫކުރި ލޯން ސަރުކާރުން މިހާރު މައާފްކޮށްދީފައިވާ ކަމަށެވެ. އަދި ސުނާމީގައި އެންމެ ބޮޑު ގެއްލުމެއް ލިބުނު ދެ ރަށުގެ ގޮތުގައި ފާހަގަކުރެވޭ ރ. ދުވާފަރުގެ ގޭބިސީތަކުގެ ރަޖިސްޓްރީ ހައްދައިދެމުންދާއިރު ވިލުފުށީގެ ގޭބިސީތަކުގެ ރަޖިސްޓްރީ ހަދައިދިނުމަށްޓަކައި އެރަށު ކައުންސިލާ މަޝްވަރާކުރަމުންދާ ކަމަށްވެސް ވިދާޅުވި އެވެ.

ރައީސް ވިދާޅުވީ ސުނާމީއަށް ފަހު ވިލުފުށި ސޭފް އައިލެންޑެއްގެ ގޮތުގައި ތަރައްގީކޮށްފައިވީ ނަމަވެސް ވިލުފުށީގެ ތަރައްގީއަށް ކުރަންޖެހޭ ކަންތައްތަކެއް ހުރުމުން އަންނަ އަހަރުގެ ބަޖެޓުގައި ބައެއް މަޝްރޫއުތައް ހިމަނާފައިވާނެ ކަމަށެވެ. އެގޮތުން ވިލުފުށީގެ ގޮނޑުދޮށް ހިމާޔަތްކުރުމުގެ މަޝްރޫއަށް 4.4 މިލިއަން ރުފިޔާއާއި ވިލުފުށީގައި ހަދަމުންދާ 56 ހައުސިން ޔުނިޓް ނިންމަން ބަޖެޓްގައި ފައިސާ ހިމަނާފައިވާނެ ކަމަށެވެ.

މީގެއިތުރުން ވިލުފުށީގެ އިޖުތިމާއީ މަރުކަޒު އިތުރަށް ތަރައްގީކުރުމަށާއި ވިލުފުށީގެ އާ ހޮސްޕިޓަލް ހެދުމަށާއި ފުޓްބޯލަ ދަނޑު ތަަރައްގީކުރުމަށާއި ސުކޫލުގައި ދެނބުރި އިމާރާތެއް އެޅުމަށް ބޭނުންވާ ފައިސާ އަންނަ އަހަރުގެ ބަޖެޓްގައި ހިމަނާފައިވާނެ ކަމަށްވެސް ރައީސް ވިދާޅުވި އެވެ.

އެމަނިކުފާނު ވިދާޅުވީ މޫސުމީ މައްސަލަތަކާއި، ބޯކޮށް ވާރޭވެހުމުންނާއި، ރާއްޖެ ސަރަހައްދުގައި އުފެދޭ ތޫފާންތަކާއި، އުދަ އެރުމާ ގުޅިގެން ރާއްޖޭގެ އެތައް ރަށަކަށް ދިމާވާ މައްސަލަތަކާއި ކުރިމަތިވާ ކަނޑުމަތީގެ ހާދިސާތައް މަދު ނޫން ކަމަށެވެ. އެހެންކަމުން މިފަދަ މައްސަލަތަކުގައި ދުރާލައި ފިޔަވަޅު އަޅައި ގައުމީ ފެންވަރުގައި މަސައްކަތް ކުރަންޖެހޭ ކަމަށެވެ.

ރައީސް ވިދާޅުވީ ދުރު މުސްތަގަބަލަށް ބަލާއިރު ރާއްޖެއަށް ކުރިމަތިވެފައި އޮތް އެންމެ ބޮޑު މައްސަލައަކީ ދުނިޔެ ހޫނުވުމުން ރާއްޖެއަށް ކުރިމަތިވާނެ މައްސަލަތައް ކަމަށެވެ. ރާއްޖޭގެ ރަށްތައް އުފެދިފައި ހުރީ ކަނޑުގެ ލޮނުގަނޑަށް ވުރެ ދޮޅު މީޓަރު އުސްކޮށް ކަން ފާހަގަކުރައްވަމުން ރައީސް ވިދާޅުވީ ރާއްޖެއަށް ކުރިމަތިވާ ގުދުރަތީ މައްސަލަތައް އެހެން ގައުމުތަކަށް ވުރެ އިތުރު ކަމަށެވެ.

ރާއްޖޭގެ 88 ރަށަށް ވުރެ ގިނަ ރަށާއި ބައެއް ފަޅު ރަށްތަކަށް ވަރަށް ބޮޑަށް ރަށް ގިރުމުގެ މައްސަލަ ކުރިމަތިވެފައިވާ ކަންވެސް ރައީސްގެ ވާހަކަފުޅުގައި ވަނީ ފާހަގަކުރައްވާފަ އެވެ. ރައީސް ވިދާޅުވީ ސުނާމީގައި ރާޅު އެޅުމާ އެކު ރާއްޖޭގެ އެތައް އިމާރާތަކާއި، އެތައް ދަނޑު ބިންތަކަކާއި، ގިނަ އިންޖީނުގެ ގެތަކެއް ހަލާކުވެ މުޅި ގައުމުން މުއާަސަލާތީ ހިދުމަތް އެތައް ގަޑިއިރަކަށް މެދުކެނޑިގެން ދިޔަ ކަމަށެވެ. އަދި އެތައް ހޮސްޕިޓަލަކާއި ސިއްހީ މަރުކަޒެއްގެ ހިދުމަތްތަކަށް ބުރޫއެރި ކަމަށާއި ފުރާ ދުއްވާ އެތައް އުޅަނދުތަކަކަށް ބޮޑެތި ގެއްލުންތަކެއް ކުރިމަތިވެ އެތައް ބަދަނރަކާއި އެތައް ފާލަމެއް ވެސް ހަލާކުވި ކަމުގައިވެސް ވިދާޅުވި އެވެ.

ރައީސް އިތުރަށް ވިދާޅުވީ ސުނާމީއާ ގުޅިގެން ކަނޑުގެ ލޮނުގަނޑު އުފުލި ކުރިމަތިވި ނުރައްކާތެރި ކާރިސާއާ އެކު މިފަދަ ހާދިސާތަކުގައި ރާއްޖެއަށް ގެއްލުންތައް ކުރިމަތިވާނެ މިންވަރު އިހްސާސްވި ކަމަށެވެ. ސުނާމީ އުފެދުނީ ރާއްޖެއާ 2500 ކިލޯމީޓަރު ދރުގައި ކަމަށްވީ ނަމަވެސް އެ ދުވަހުގެ ރާއްޖޭގެ ރަށްތަކަށް 14 ފޫޓަށް ވުރެ އުސް ރާޅު އަރާފައިވާ ކަންވެސް ރައީސް ވަނީ ފާހަގަކުރައްވާފަ އެވެ. އަދި އެ ދުވަހުގެ ކާރިސާގައި ރާއްޖޭގެ 190 ވަރަކަށް ރަށަކަށް އެކިވަރުގެ ގެއްލުންތައް ލިބުނުއިރު ފަސް ރަށަކަށް ބޮޑެތި ގެއްލުންތަކެއް ލިބުނު ކަމަށްވެސް ރައީސް ވަނީ ވިދާޅުވެފަ އެވެ.