"ރަސްމާލެ" ތަރައްގީކުރަން ފުށިދިއްގަރު ފަޅު ހިއްކަން ފެށުން ފާހަގަކުރުމުގެ ގޮތުން އެ ފަޅުގައި ކުރިއަށްދާ ރަސްމިއްޔާތުގައި ވާހަކަފުޅުދައްކަވަމުން ރައީސް މުއިއްޒު ވިދާޅުވީ ކުރިއަށް އޮތް ތަނުގައިވެސް ދިވެހި ރައްޔިތުންނަށް މި ސަރުކާރުން ފެންނާނީ އިހްލާސްތެރިކަމާއި ތެދުވެރިކަމާ އަދި އަމާނާތްތެރިކަން ކަމަށެވެ.
ރައީސް މުއިއްޒު ވިދާޅުވެފައި ވަނީ ރައްޔިތުންނަށް ވައުދުވި ގޮތަށް އަމިއްލަ ގެދޮރު ބިނާކުރުމަށްޓަކައި ސަރުކާރުން ލޯނު އެހީ ދިނުމަށް ވާން ޖެހޭ ތައްޔާރީތައް ދަނީ ކުރިއަށް ކަމަށެވެ. އެގޮތުން އެކި ކަހަލަ ހައުސިން ލޯނުތައް ދޫކުރުމަށް ބޭންކިން ނިޒާމުގެ ތެރެއިން ފަހިކުރަން ޖެހޭ ކަންކަން ހަމަޖައްސައި އެ ކަންކަން އިއުލާނުކުރައްވާނެ ކަމަށް ރައީސް މުއިއްޒު ވިދާޅުވި އެވެ.
ރައީސް މުއިއްޒު ވިދާޅުވި ގޮތުގައި ފަސް އިންސައްތައަށް ވުރެ ކުޑަކޮށް ދޫކުރާ ލޯނުތައް ދޫކުރުމަށްޓަކައި ކުރަން ޖެހޭ އިދާރީ އަދި ފަންނީ މަސައްކަތްތައް ފުރިހަމަކުރުމަށްފަހު، ރައްޔިތުންނަށް ބޭނުންވާ އެކި ކަހަލަ ލޯނުތައް ދޫކުރުމުގެ މަސައްކަތް ފެށިގެންދާނެ ކަމުގަ އެވެ.
