Advertisement

ގައުމުގައި ހުރި ބޮޑެތި މައްސަލަތަކުގެ ނަތީޖާއަކީ ފަރުދީ ޒިންމާއަށް އިހްމާލުވުމުން ކުރިމަތިވި މައްސަލަތަކެއް ކަމުގައި ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހް ވިދާޅުވެއްޖެ އެވެ.

ރައީސް ސޯލިހް މިހެން ވިދާޅުވީ ރާއްޖޭގައި މިއަދު ފާހަގަކުރަމުންދާ އެއްބައިވަންތަކަމުގެ ދުވަހުގެ މުނާސަބަތުގައި ތ. ވިލުފުށީގައި ބޭއްވި ރަސްމިއްޔާތުގައި ވާހަކަދައްކަވަމުންނެވެ.

ރައީސް ވިދާޅުވީ ގައުމީ އެއްބައިވަންތަކަމުގެ ދުވަހެއް މިއަދު ފާހަގަކުރަމުންދާއިރު އެއްބައިވަންތަކަމާއި އެކުވެރިކަން ކުރިއަށް ނެރެގެން ނޫނީ ހައްލުކުރަން އުދަގޫ އެތައް ކަމެއް އެބަހުރި ކަމަށެވެ.

ރައީސްގެ ވާހަކަފުޅުގައި ވަނީ ދީނީ ހަރުކަށި ފިކުރުތަކާއި، ދީނަށް އިހާނަތްތެރިކޮށް ހިތުމާއި، މާރާމާރީއާއި، ގޭންގް ކުށްތަކާއި، މަސްތުވާތަކެތީގެ މައްސަލަތަކަކީ ގައުމުގައި މިވަގުތަށް ހުރި އެންމެ ބޮޑެތި މައްސަލަތަކުގެ ގޮތުގައި ފާހަގަކުރައްވާފަ އެވެ.

"މިފަދަ ކަންތައްތަކަކީ ގާނޫނުތައް ނެތިގެން ނުވަތަ އަދަބުތައް ކަނޑައެޅިފައި ނެތިގެން ހިނގާ ކަންކަމެއް ނޫން. މިބާވަތުގެ ކޮންމެ ކަމަކީ ވެސް ފަރުދީ ޒިންމާއަށް އިހްމާލުވުމުގެ ނަތީޖާ. މުޖުތަމައުގެ މަސްލަހަތުގެ މައްޗަށް ތިމާގެ އަމިއްލަ ކަންކަން އިސްކުރުމުގެ ނަތީޖާ. އަނެކުންގެ ހައްގުތަކަށް އަރައިގަނެގެން ދިޔަކަސް ތިމާގެ އަމިއްލަ އެދުންތައް ހާސިލްކުރަން އުޅުމުން ގެއްލިގެން އެދަނީ މުޅި މުޖުތަމައުގެ އަމާންކަމާއި ހަމަޖެހުން،" ރައީސް ވިދާޅުވި އެވެ.

އެމަނިކުފާނު ވިދާޅުވީ މިއަދު އަޅުގަނޑުމެން އަޒުމަކަށް ހަދަންވީ މިފަދަ ހުރިހާ ކަމަކާ ދެކޮޅު ހަދާ މިފަދަ ކަންކަން ހުއްޓުވުމަށް މަސައްކަތް ކުރުމަށް ކަމަށެވެ. މުޖުތަމައުގައި ހުރި މައްސަލަތައް ސިއްރު ކުރުމުގެ ބަދަލުގައި މިފަދަ މައްސަލަތައް ކަމާ ގުޅޭ އިދާރާތަކާ ހިއްސާކުރާ ބަޔަކަށް އަޅުގަނޑުމެން ވުމަށްވެސް ރައީސް ވަނީ އެދިވަޑައިގެންފަ އެވެ. މައްސަލަތަކުގެ ވާހަކަ ކިތަންމެ ވަރަކަށް ދެއްކި ނަމަވެސް މުޅި މުޖުތަމައު އެކުގައި ތެދުވެގެން ނޫނީ މައްސަލަތައް ހައްލު ނުކުރެވޭނެ ކަމުގައިވެސް ވިދާޅުވި އެވެެ.

"ކުރިން މިދެންނެވި ނޭއްގާނީ އަމަލުތަކުގައި ހަރަކާތްތެރިވާ ހުރިހާ ފަރާތްތަކަކަށް ވެސް އަޅުގަނޑު ދަންނަވާލަން އޮތީ އަދި ވަގުތު ފާއިތެއް ނުވޭ. މިހާރު ތިޔަ ހިންގާ ނުރަނގަޅު މަގު ދޫކޮށް އިސްލާހުގެ މަގު ހިޔާރުކުރާށޭ. އެކަހެރިވުމާއި ވަކިވެގަތުމުގެ ގޮތްތައް ދޫކޮށް އިޖުތިމާއީ މިންގަނޑުގެ ތެރެއަށް ވަނުމަށް ސަމާލުކަން ދޭށޭ.،" ރައީސް ވިދާޅުވި އެވެ.

ކުށްތަކުގައި އުޅޭ ދިވެހިންނަށް އިޝާރާތްކުރައްވާ ރައީސް ވިދާޅުވީ ތިޔަ އެންމެންނަކީ ވެސް މިގައުމުގެ ރައްޔިތުން ކަމަށެވެ. އެހެންކަމުން އެއްވެސް ރައްޔިތަކަށް ދެރަ ގޮތް ވުން އެއީ އެމަނިކުފާނު އެދިވަޑައިގަންނަވާ ގޮތް ނޫން ކަަމަށްވެސް ވިދާޅުވި އެވެެ. އިސްލާހުގެ މަގު ހިޔާރުކުރާ މީހާއަށް ދެ ދުނިޔޭގައި ވެސް ލިބޭނީ ކާމިޔާބާއި ބާއްޖަވެރިކަން ކަމުގައިވެސް ރައީސް ވިދާޅުވި އެވެ.

"އާދެ! އެއްބައިވަންތަކަމުގެ ދުވަހެެއް ފާހަގަކުރާއިރު މިއަދު އަޅުގަނޑުމެން އެއްބައިވާންޖެހިފައި މިވަނީ މިފަދަ [ކުށްތަކާ] ދެކޮޅަށް. އެންމެން އެއް އަޒުމެއްގައި މަސައްކަތް ކުރަންވީ މިމައްސަލަތައް ހައްލުކުރަން. މިއީ އެންމެންގެ ގައުމެއް. އަޅުގަނޑުމެން ދިރިއުޅެން އޮތް ފަސްގަނޑަކީ މިއީ. މިތަނުގެ ހަމަޖެހުމާއި ސުލްހައާއި އަމާންކަން ދެމިއޮންނާނީ އަޅުގަނޑުމެން އެކަންކަމަށް އިސްކަން ދިން މިންވަރަކުން.،" ރައީސްގެ ވާހަކަފުޅު ނިންމަވާލައްވަމުން ވިދާޅުވި އެވެ.