އުމުރުން 23 އަހަރުގެ ނޯވޭގެ ކުޅުންތެރިޔާ ވަނީ 2022-23 ވަނަ އަހަރުގެ ސީޒަނުގައި ސިޓީން ޕްރިމިއާ ލީގާއި ޗެމްޕިއަންސް ލީގާއި އެފްއޭ ކަޕް ކާމިޔާބުކުރިއިރު މުހިއްމު ދައުރެއް އަދާކޮށްފައެވެ. އޭނާވަނީ ހުރިހާ މުބާރާތަކުން 52 ގޯލު ޖަހައިފަ އެވެ.
ޕްރިމިއާ ލީގުގެ ކްލަބަކަށް ސީޒަނެއްގެ ތެރޭގައި މިއަށްވުރެ ގިނަ ގޯލް އެއްވެސް ކުޅުންތެރިއަކު ކާމިޔާބުކޮށްފައެއް ނުވެއެވެ. ނިމުނު ސީޒަންގެ ޕްރިމިއާ ލީގުގެ ގޯލްޑަން ބޫޓު ހާލަންޑް ހޯދީ 38 މެޗުގައި ރެކޯޑް އަދަދަކަށް 36 ގޯލު ޖަހައިގެންނެވެ.
"ބީބީސީ ވޯލްޑް ސްޕޯޓްސް ސްޓާ އޮފް ދަ އިޔާ އަށް އަހަންނަށް ވޯޓު ދިން ކަމަށްޓަކައި ޝުކުރިއްޔާ. މިދިޔަ ސީޒަނަކީ ގަބޫލުކުރަން ދަތި ސީޒަނެއް - އަހަރެން ޓްރެބަލް ކާމިޔާބުކުރިއިރު އަހަރެމެން އަޖައިބު ކުރުވަނިވި ކަމެއް ކުރިން،" ހާލަންޑް ބުންޏެވެ.
ބީބީސީ ވޯލްޑް ސްޕޯޓްސް ސްޓާ އޮފް ދަ އިޔާ އަށް ވޯޓު ދީފައިވަނީ ބީބީސީ ސްޕޯޓްސްގެ ކިޔުންތެރިންނެވެ.
