މި އަހަރުގެ އެފްއޭ ކަޕް ކެންސަލް ކުރުމުން، އެއްވަނަ ޑިވިޝަނަށް ފުޓްބޯޅަ ސީޒަން ނިމުނީއެވެ. އެއްވަނަ ޑިވިޝަނަށް މި އަހަރު އޮތީ، ޗެރިޓީ ޝީލްޑް މެޗާ، ޕްރެޒިޑެންޓްސް ކަޕް އަދި ދިވެހި ލީގުގެ އެއްބަޔެވެ. އަންނަ ސީޒަން ފަށާނެ އިރެއް ނޭނގެއެވެ. އެފްއޭއެމްގެ ޖެނެރަލް ސެކްރެޓަރީ، ޖައުޝަން ޝަރީފް ސީއެމްއެމަށް މައުލޫމާތު ދެއްވަމުން، އެފްއޭ ކަޕް ނޯންނާނެކަން ކަށަވަރު ކޮށްދެއްވިއެވެ.
އެފްއޭއެމުން މިހާރު މަސައްކަތް ކުރަމުން އަންނަނީ އަންނަ ހަފްތާގައި ދެވަނަ ޑިވިޝަން މުބާރާތް ފަށާށެވެ. ދެވަނަ ޑިވިޝަން އަންނަ ހަފްތާގައި ފަށަން މަސައްކަތް ކުރާއިރު، އެ މުބާރާތް ތިން ފަހަރެއްގެ މަތިންވަނީ ފަސް ވެފައެވެ.
މި އަހަރުގެ އެފްއޭކަޕް ކެންސަލް ކުރިއިރު، މިދިޔަ އަހަރު އެފްއޭއެމް އިން، އެފްއޭ ކަޕް ބާއްވާފައިވަނީ 2017 ވަނަ އަހަރުގެ ފަހުން ފުރަތަމަ ފަހަރަށެވެ. ޕްރެޒިޑެންޓްސް ކަޕްވެސް މި އަހަރާއި މިދިޔަ އަހަރު ބޭއްވީ ބޮޑު މެދު ކެނޑުމަކަށް ފަހުއެވެ.
