ބަނޑުފިލާ ޗެލެންޖަކީ، ގައުމީ ބޮޑީބޯޑިން ލީގުގެ ފަހު މުބާރާތެވެ. މި މުބާރާތާއެކު، ބޮޑީބޯޑިން ލީގު ޗެމްޕިއަންކަން ޖާއްޓޭއަށްވަނީ ލިބިފައެވެ.
މާލޭ ވަރުނުލާ ރާޅުގަނޑަގައި އޮތް މި މުބާރާތުގެ މެންސް އޯޕަން ކެޓަގަރީގެ ފައިނަލުގައި ޖާއްޓެ ނުކުތީ މުހައްމަދު އަޒާން އަހްމަދާ ދެކޮޅަށެވެ. ފައިނަލް ހީޓުގެ ބޮޑުބައިގައި ލީޑު ކުރީ އަޒާނެވެ. މި ހީޓު ޖައްޓޭ ކާމިޔާބުކުރީ 9.60 އިންނެވެ. އަޒާން އަށް ލިބުނީ 9.34ގެ ސްކޯ އެކެވެ.
މި މުބާރާތުގެ ޑްރޮޕް-ނީ ކެޓަގަރީގެ ޗެމްޕިއަންކަން ހޯދީ އަލީ ޚުޝްރުވާން އަހުމަދު (ކުޑަ އައްޔަ) އެވެ. ކުޑަ އައްޔައާ ދެކޮޅަށް ފައިނަލުގައި ނުކުތީ ހުނަރުވެރި ބޮޑީބޯޑަރު އާމިން އުމަރު މޫސާ އެވެ.
މި މުބާރާތުގެ ޖޫނިއާ މެންސް ކެޓަގަރީގެ ޗެމްޕިއަންކަން އާމިން ވަނީ ދިފާއުކޮށްފަ އެވެ.
ގައުމީ ބަނޑުފިލާ ޗެލެންޖުގެ ނަތީޖާތަކާ އެކު ގައުމީ ބޮޑީބޯޑިން ލީގުގެ ޗެމްޕިއަންކަން ޖާއްޓެ ހޯދީ ޖުމްލަ 2610 ޕޮއިންޓް ހޯދައިގެންނެވެ. ލީގުގެ ޖޫނިއާ ޗެމްޕިއަންކަން އާމިން ހޯދީ 3000 ޕޮއިންޓާ އެކުގަ އެވެ. އަދި ގައުމީ ލީގުގެ އެންމެ މޮޅު ޓީމަކަށް ހޮވިފައިވަނީ މާލެ ސިޓީ އެވެ.
