ގައުމީ އެއްބައިވަންތަކަމުގެ ދުވަހުގެ މުނާސަބަތުގައި މިރޭ އޮތް ރަސްމިޔާތުގައި ވާހަކަފުޅު ދައްކަވަމުން ރައީސް މުހައްމަދު މުއިއްޒު ވިދާޅުވީ، އިހު ޒަމާނުގައި ދިވެހީންގެ ތެރޭގައި އުފެދިފައި އޮތީ މާތް އަހްލާގީ ޖީލެއް ކަމަށެވެ. އަދި ހަރުދަނާ މުޖުތަމައުއެއް އުފެދި، ޒިންމާދާރު ގައުމެެއް ބިނާވި ކަމަށެވެ.
އެ ހުރިހާ ސިފަތަކެެއް ދިވެހީންގެ ގައިގާ އުފެދިގެން އައީ އިސްލާމީވަންތަ އެެއްބައިވަންތަ ގައުމަކަށް ރާއްޖެ ވުމުން ކަމަށް ރައީސް ވިދާޅުވި އެވެ.
މިއަދު ރާއްޖެއަށް އާދެވިފައިވާ ހިސާބާ ބެހޭގޮތުން ވާހަކަފުޅު ކުރިއަށް ގެންދަވަމުން ރައީސް ވިދާޅުވީ، އެއީ ވިސްނާލަން ރަނގަޅު ކަމެެއް ކަމަށެވެ.
ރައީސް ވިދާޅުވީ، އެ މަނިކުފާނު ދެކެން ބޭނުންވަނީ މާޒީން ފެނުނު އެކުވެރިކަމާ ގުޅުންތެރިކަމުގެ ދުވަސް ކަމަށެވެ. މިއަދު ފާހަގަކުރާ އެެއްބައިވަންތަކުގެ ދުވަހުން ލިބިގަންނަންވީ ފިލާވަޅަކީ އެއީ ކަމަށް ރަައީސް ވިދާޅުވި އެވެ.
ރައީސް ވިދާޅުވީ، މާޒީގައި ދިވެހީން އުޅުނީ އެކަކުގެ އަންނައުނުން އަނެކެއްގެ އުނު ނިވާކޮށްދީ، އެކެއްގެ ބަތް ސުވަލުން އަނެކެެއްގެ ހައިހޫނުކޮށްދީގެން ކަމަށެވެ. އަދި އޭރު ދިވެހީން އުޅުނީ އެކެއްގެ ރެއާ ދުވާލު މަސައްކަތުން ހިލޭ ސާބަހަށް އަނެކެއްގެ ގޯތި ކުނިކަހާ ސާފުކޮށްދީގެން ކަމަށް ވިދާޅުވި އެވެ.
