.ޔޫތް މިނިސްޓްރީން ނެރެފައިވާ ބަޔާނުގައި ބުނެފައިވަނީ ފެސްޓިވަލްގެ ރޭގަނޑުގެ ހަރަކާތްތައް ފަސްކޮށްފައިވަނީ މޫސުމާބެހޭ ގައުމީ އިދާރާއިން މުޅި ރާއްޖެ ހިމެނޭހެން ރީނދޫ އެލާޓް ނެރެފައިވާތީ ދަތުރުފަތުރު ކުރުމުގައި ދިވާނެ ދަތިތަކާއި ގުޅިގެން ކަމަށާއި އަދި ހަމަ އެހެންމެ މޫސުން ރަނގަޅުވުމުން މި ފެސްޓިވަލް ބާއްވާނެ ތާރީހެއް އިއުލާނު ކުރާނެ ކަމަށެވެ.
މޫސުމާ ބެހޭ ގައުމީ އިދާރާއިން ބުނާގޮތުގައި ރާއްޖެއަށް މިކުރަނީ މޫސުމީ ވިއްސާރައެކެވެ.
ޔޫތް މިނިސްޓްރީން ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމުގައި ޔޫތް މިނިސްޓަރު އަސްވާޑް ވިދާޅުވީ "ދިވެހިންގެ ރާއްޖެ" ނަމުގައި އާ އަހަރު ފާހަގަ ކުރަން ބާއްވާ ފެސްޓިވަލުގައި އެންމެ އިސްކަން ދޭނީ ދިވެހި ފަންނާނުންނަށް ކަމަށެވެ.
ފެސްޓިވަލުތެރެއިން ދިވެހި ފަންނާނުން ބައިވެރިގެން ލޭޒާ ޝޯއެއް ވެސް ބާއްވާނެ ކަމަށާއި ކުޑަކުދިންގެ ހަވީރެއް އަންނަ އާދިއްތަ ދުވަހު އޮންނާނެ ކަމަށް މިިނިސްޓަރު ވިދާޅުވި އެވެ.
