ބޮޑު އަނދަވަޅަކަށް ވެއްޓިފައިވާ ދިވެހި ފުޓްބޯޅައިގެ ހާލަތު، ޖަރުމަނަށް 2014 ގެ ވޯލްޑް ކަޕް ކާމިޔާބުކޮށް ދިނުމުގައި ހިއްސާވި ފޯވާޑް ލޫކަސް ޕޮޑޮލްސްކީ އަށް، ސްޕޯޓްސް މިނިސްޓަރު ރާފިއު ކިޔައިދެއްވީ، ޕޮޑޮލްސްކީ ރާއްޖެއަށް ކުރި ޗުއްޓީ ދަތުރަށް ފަހު ފުރަން ގޮސް އެއަޕޯޓުގައި ހުއްޓައެވެ.
މި ބައްދަލުކުރުމާ ގުޅޭ ގޮތުން، ސްޕޯޓްސް މިނިސްޓްރީން ބުނީ ފުޓްބޯޅައިގެ ކުރިމަގުގެ ޕްލޭންތަކާ ބެހޭގޮތުން މަޝްވަރާ ކުރެވުނު ކަމަށެވެ. އަދި އެ މަސައްކަތައް އާސެނަލް އާއި އޭސީ މިލާން އަށް ކުރިން ކުޅުނު ފޯވާޑްގެ އެއްބާރުލުން ދެވޭނެ ގޮތަކާ ބެހޭގޮތުން މަޝްވަރާ ކުރެވުނު ކަމަށް ވެސް މިނިސްޓްރީން ބުންޏެވެ. މިނިސްޓަރު ވަނީ، ރާއްޖޭގެ ގައުމީ ޓީމުގެ ޖޯޒީއެއް ވެސް ޕޮޑެލްސްކީ އަށް ހަދިޔާ ކުރައްވައިފަ އެވެ.
ދިވެހި ފުޓްބޯޅައިގެ ހާލަތު ޕޮޑޮލްސްކީއަށް ކިޔައިދިންއިރު، ދިވެހި ފުޓްބޯޅަވަނީ ދުވަހަކުވެސް ނުވެއްޓޭވަރުގެ ބޮޑު އަނދަވަޅަކަށް ވެއްޓިފައެވެ.
