މަޖިލީހުގައި އަންހެނުންގެ ބައިވެރިވުން އިތުރުކުރުމަށް ކަމާގުޅުންހުރި އެކި ފަރާތްތަކާއެކު މަސައްކަތް ފެށުމަކީ ރައީސް މުއިއްޒުގެ އެޑްމިނިސްޓްރޭޝަންގެ ހަފުތާ 14ގައި ހިމެނޭ ކަމެކެވެ.

ޖެންޑާ އީކުއަލިޓީ އެކްޝަން ޕްލޭންގެ ސްޓިއަރިން ކޮމިޓީއާއެކު ނައިބު ރައީސް ހުސެއިން މުހައްމަދު ލަތީފު ބޭއްވި ބައްދަލުވުމާއި ގުޅޭގޮތުން ރައީސް އޮފީހުން ބުނީ އަންހެނުން ބާރުވެރިކުރުމަށް ކުރެވޭ މަސައްކަތްތައް މިހާރަށް ވުރެ ފުޅާކޮށް ކުރިޔަށްގެންދިއުމަށާއި އަދި ހާއްސަކޮށް ރައްޔިތުންގެ މަޖިލީހުގައި އަންހެނުންގެ ދައުރު އިތުރުކުރުމަށް މަޝްވަރާކުރެވުނު ކަމަށެވެ.

ރައީސް ޑރ. މުއިއްޒު މިފަހުން ވިދާޅުވީ، ކުރިއަށް އޮތް ރައްޔިތުންގެ މަޖިލިހުގައި އިންތިހާބުގެ 93 ގޮނޑީގެ ތެރެއިން 19 ގޮނޑި އަށް އަންހެނުން ނެރުމަށް ދިވެހި ވިޔަފާރިވެރިން ނުކުމެ، މަސައްކަތް ކޮށްދިނުން ވާނީ ގައުމަށް ކޮށްދެވޭނެ ވަރަށް ބޮޑު ކަމަކަށެވެ.

މިހާރު ހިނގަމުންދާ 19 ވަނަ ރައްޔިތުންގެ މަޖިލިހުގައި ތިއްބަވާ 87 މެމްބަރުންގެ ތެރެއިން އަންހެނުންގެ އަދަދަކީ އެންމެ ހަތަރެކެވެ.