ޕަބްލިކް ވޯކްސް މިނިސްޓަރު މިއަދު "އެކްސް" ގައި ކުރެއްވި ޕޯސްޓެއްގައި ވިދާޅުވީ، އަމީނީމަގު ހެދުމުގެ ޕްރޮޖެކްޓާއި ގުޅިގެން މާފަންނުގައި ދިމާވެފައިވާ ޓްރެފިކް މައްސަލައަށް ހައްލެއް ގެނައުމުގެ ގޮތުން ހިރިޔާސްކޫލާއި އިންވެގެން ބަންދުކުރެވިފައިވާ ގޯޅި އަލުން ހުޅުވުމުގެ މަސައްކަތް ކުރަމުންދާ ކަމަށެވެ.
އެގޮތުން އެ މަގު ހުޅުވުމަށްޓަކައި އެސަރަހައްދު ސާފުކުރުމުގެ މަސައްކަތް ފެށިގެން ކުރިއަށް ދާކަމަށް މިނިސްޓަރު ވިދާޅުވި އެވެ.
ރައީސް ޑރ. މުއިއްޒާއި މިނިސްޓަރު ޝަރީފް ވަނީ އެ މަގު ސާފުކުރުމުގެ މަސައްކަތް ކުރިއަށްދާ ގޮތް ބައްލާލެއްވުމަށް މިއަދު އެ ސަރަހައްދަށް ވަޑައިގެންފަ އެވެ.
އެ މަގަކީ މީގެ ހަ އަހަރު ކުރިން ރަސްފަންނު ސަރަހައްދުގައި ލަގްޒަރީ ހައުސިން ޕްރޮޖެކްޓެއް ކުރިއަށް ގެންދިއުމަށް ދޫކޮށްފައިވާ ބިމެކެވެ. އެހެންނަމަވެސް މިއަދާ ހަމައަށް އައިއިރު އެ ބިމުގައި އެއްވެސް މަސައްކަތެއް ކޮށްފައެއް ނުވެއެވެ.
