މި މަހުގެ 31 ވަނަ ދުވަހު އެފްއޭއެމްގެ އިންތިހާބު ބާއްވަން އެ އިދާރާއިން ނިންމާފައިވާއިރު، އެ އިންތިހާބު ފަސްކުރަން ސްޕޯޓްސް ކޮމިޝަނަރު މުހައްމަދު ތޮލާލް، އެފްއޭއެމަށްވަނީ އަންގާފައެވެ. އެހެންނަމަވެސް އެ އެންގުން ބޮލާލައި ޖަހައި، އެފްއޭއެމުން އަންނަނީ އިންތިހާބު ކުރިއަށް ގެންދަން މަސައްކަތް ކުރަމުންނެވެ. އިންތިހާބުގެ އެއްވެސް ކަމެއް ހުއްޓާނުލާނެ ކަމަށް އެފްއޭއެމުންވަނީ ބުނެފައެވެ.
ސްޕޯޓްސް މިނިސްޓްރީން މިއަދު ބޭއްވި ނޫސްވެރިންގެ ބައްދަލުވުމުގައި، ތޮލާލް ވިދާޅުވީ، އެފްއޭއެމްގެ ކޮންމެ އިންތިހާބަކާ ދިމާކޮށް ވެސް ފީފާގެ ސަސްޕެންޝަނުގެ ވާހަކަ އަންނަ ކަމަށާއި، މި ފަހަރުވެސް އެ ވާހަކަ އަންނާނެ ކަމަށެވެ. އަދި ސަސްޕެންޝަނަކާ ހަމައަށް ގެންދަން މަސައްކަތް ކުރާ ކަމަށްވާނަމަ ކޮމިޝަނާ އޮފް ސްޕޯޓްސްގެ ފަރާތުން އެ ލިބެން ޖެހޭ އެއްބާރުލުމަށް ހުއްޓުންތަކެއް އައިސްފާނެ ކަމަށް ތޮލާލް ވިދާޅުވިއެވެ.
މި މަހުގެ 31 ވަނަ ދުވަހު ބާއްވަން ނިންމާފައިވާ، އެފްއޭއެމްގެ އިންތިހާބު ހުއްޓާލަން، ކޮމިޝަނަރ އޮފް ސްޕޯޓްސް އަންގާފައިވާކަން ފީފާ އަދި އޭއެފްސީއަށް އަންގާފައިވާ ކަމަށް އެފްއޭއެމުންވަނީ ބުނެފައެވެ.
