ރޭ ގަލޮޅު ކަންމަތީގައި ބޭއްވި ކެމްޕެއިން ޖަލްސާގައި ވާހަކަ ދައްކަވަމުން އާޒިމާ ވިދާޅުވީ، އިދިކޮޅު ފަރާތް ތަކުން ކިތަންމެ ދުންޏެއް އުކާ ހަނގުރާމަ ކުރައްވަން އުޅުނު ނަމަވެސް ސަޕޯޓަރުންގެ ލަޝްކަރު ސާބިތު ކަމާއެކު ތިބިހާ ހިނދަކު ކެނޑިޑޭޓުންގެ ހިއްވަރު އެލިގެން ނުދާނެ ކަމަށެވެ.
އާޒިމާ ވިދާޅުވީ އޭނާގެ ޓީމް ދާނީ ބާރަށް ކުރިއަށް ކަމަށާއި، އެ ބާރުމިނުގައި ގޮސް ހޮނިހިރު ދުވަހުގެ އިންތިހާބު ކާމިޔާބު ކުރައްވާނެ ކަމަށެވެ. އަދި އޭނާ ވަނީ ކާމިޔާބީގެ އުފާ ފާޅު ކުރުމަށް ތައްޔާރަށް ތިއްބެވުމަށް ސަޕޯޓަރުނަށް އަންގަވާފަ އެވެ.
މީގެ އިތުރުން، ބާރަށް ކުރިއަށްދާ މީހުނަށް ދަތިތައް ކުރިމަތިވާނެ ކަމަށާއި، ކާމިޔާބީއާއި ކައިރިވާ ވަރަކަށް ގޮންޖެހުންތައް ވެސް އިތުރުވާނެ ކަމަށް އާޒިމާ ވިދާޅުވި އެވެ. އެހެންނަމަވެސް އޭގެ ސަބަބުން އޭނާގެ ޓީމް ފަހަތައް ޖައްސައި ނުލެވޭނެ ކަމަށް އޭނާ ވިދާޅުވި އެވެ.
އާޒިމާ އިތުރަށް ވިދާޅުވީ ރިޔާސީ އިންތިހާބު ކާމިޔާބު ކުރެވުނު ނަމަވެސް، މަސައްކަތް ފުރިހަމަ ވާނީ މާލެ ސިޓީ ކައުންސިލްގެ އިންތިހާބާއި މަޖިލިސް އިންތިހާބުވެސް ކާމިޔާބު ކުރެވިގެން ކަމަށެވެ. އެހެންކަމުން ސަފުތައް ރޫޅުނަ ނުދީ ކުރިއަށްގޮސް ސަރުކާރު ކޯލިޝަންގެ ކެންޑިޑޭޓުން ހޮވައިދެއްވުމަށް އޭނާ އެދިވަޑައިގަތެވެ.
