މި ސައިކަލު ބުރު ފެށީ އިއްޒުދީން މަގު ހައުސިންގ މިނިސްޓްރީ ކައިރިންނެވެ.
މިއަދު އޮތް ސައިކަލު ބުރުގައި ނާއިބު ރައީސް ހުސައިން މުހައްމަދު ލަތީފާއި ޕީއެންސީގެ ޗެއާމަން އަބްދުއްރަޙީމް (އަދުރޭ) އާއި ވަޒީރުންނާއި ސަރުކާރުގެ އިސް ބައެއް ބޭފުޅުންނާއި ޕީޕީއެމާއި ކޮންގްރެސް ޕާޓީގެ އިސް ބޭފުޅުންނާއި ގިނަ އަދަދެއްގެ އާންމުން ވަނީ ބައިވެރިވެފަ އެވެ.
އާޒިމާ މިއަދު ވެސް ވިދާޅުވީ އެކަމަނާގެ މަގުސަދަކީ މާލެ އަކީ އެކާވީސް ވަނަ ގަރުނަށް ފެތޭ ސިޓީ އަކަށް ހެދުން ކަމަށެވެ.
އޭނާ ވިދާޅުވީ، މިހާރު ރައީސް ޑރ. މުހައްމަދު މުއިއްޒު ކުރައްވާ މަސައްކަތަށް ހުރަސް އަޅާނެ މީހަކު މޭޔަރުކަމަށް ގެނެވިއްޖެނަމަ މާލޭގެ ތަރައްގީއާ ކުރިއެރުމަށް ވަރަށް ބޮޑު ހުރަސްތަކެއް ކުރިމަތިވާނެ ކަމަށެވެ.
އާޒިމާގެ މޭޔަރު އިންތިހާބަށް މެނިފެސްޓޯ އެއްވެސް ވަނީ އާއްމުކޮށްފައި އެވެ. މެނިފެސްޓޯގައި ހުރި މައިގަނޑު ކަންކަމަކީ:
- ހިތްހަމަޖެހިގެން ހިނިތުންވުމާއެކު
- ގުޅިގެން އެކުގައި ތަރައްގީކުރުމުގައި ބައިވެރިވުން
- ގްރޭޓާ މާލޭގެ ކަނޑުފަޅު ފަރުގެ ފުރިހަމަ ނަފާއަށް
- ފަޚުރުވެރި އަންހެނުން
- އިލްމާއި ހުނަރުގެ ވެށި
- 21ވަނަ ޤަރުނަށް ފައްކާ ކުރެވިފައި
- ދިވެހިންގެ އިޤްތިޞާދުގެ ވިންދު
- ހަމަޖެހިގެން ދިރިއުޅެވޭނެ މާހައުލެއް
މި ކަންކަމުގެ ތެރެއިން، ޒުވާނުންނާއި، ފްރީލާންސަރުންނަށް ބޭނުންވާ ވަސީލަތްތައް ގާއިމްކުރުމާއި، ކުޅިވަރު ކުޅޭނެ ތަންތަން ގާއިމްކުރުން ހިމެނެއެވެ. އަދި ސިވިލް ޑިފެންސްގެ އެކި ކަންކަން ތައާރަފްކުރުން ހިމެނެއެވެ.
ހަމައެއާއެކު މާލޭގައި ފެހިކަން އިތުރުކުރުމަށް ރާއްޖޭގައި ހެދޭ ހުރިހާ މާމެލާމެލީގެ ބަގީޗާއެއް ހެދުން ވެސް އާޒިމާގެ މެނިފެސްޓޯގައި ހިމެނެއެވެ.
އަދި އިސްރަށްވެެހިންނަށް ޚާއްސަ މަރުކަޒުތަކާއި، ޚާއްސަ އެހީއަށް ބޭނުންވާ މީހުންނަށް ކަންކަން ފަހިކޮށްދިނުމަށް ޚާއްސަަ ސަމާލުކަމެއް ދިނުން ހިމެނެއެވެ.
މީގެ އިތުރުން އާޒިމާ ވިދާޅުވީ މާލޭގައި ބޮއްސުންލައިފައި އޮތް ބުޅަލުގެ މައްސަލަ ހައްލުކޮށްދެއްވުމަށް ޓަކައި ވެެސް މަސައްކަތްކޮށްދެއްވާނެ ކަމަށެވެ.
މާލޭ ސިޓީގެ މޭޔަރު ހޮވަން ބާއްވާ ބައި-އިލެކްޝަންގައި ފަސް ބޭފުޅަކު ވާދަ ކުރައްވަ އެވެ. އެއީ ޕީޕީއެމް/ޕީއެންސީގެ ޓިކެޓްގައި ވާދަކުރައްވާ ކުރީގެ ބަންޑާރަ ނައިބު އައިޝަތު އާޒިމާ ޝަކޫރާއި އެމްޑީޕީގެ ފަރާތުން ވާދަކުރައްވާ އެމްޓީސީސީގެ ކުރީގެ ސީއީއޯ އާދަމް އާޒިމާއި ކުރީގެ ރައީސް އަބްދުﷲ ޔާމީން އުފައްދާ ޕީޕަލްސް ނެޝަނަލް ފްރޮންޓްގައި އިސްކޮށް ހަރަކާތްތެރިވާ ކުރީގެ ފުލުސް ކޮމިޝަނަރު ހުސައިން ވަހީދުގެ އިތުރުން ޑިމޮކްރެޓްސްގެ ފަރާތުން ވާދަކުރައްވާ ސައިފް ފާތިހުގެ އިތުރުން އަމިއްލަ ގޮތުން ވާދަ ކުރައްވާ ޝުއައިބު އަލީ(ފުރަހަނި ޝުއައިބު) އެވެ.
މާލޭގެ މޭޔަރު ކަމުގެ މަގާމު ހުސްވީ މުޅި ސިޓީގެ ރައްޔިތުން ވޯޓްލައިގެން މޭޔަރު އިންތިހާބު ކުރާ ގޮތަށް ގާނޫނު ބަދަލު ކުރި ފަހުން ވޯޓުން އިންތިހާބުވެ ވަޑައިގެންނެވި ފުރަތަމަ މޭޔަރު ޑރ. މުހައްމަދު މުއިއްޒު ރާއްޖޭގެ ރައީސުލްޖުމްހޫރިއްޔާގެ މަގާމާ ހަވާލުވެވަޑައިގަތުމުންނެވެ.
