އައްޑޫ ސިޓީ ޒޯން ސްޓޭޑިއަމް މަރާމާތުކުރުމުގެ މަސައްކަތް ހަވާލުކޮށްފައިވަނީ ނޫރައްދީން އިންވެސްޓްމަންޓް ކިޔާ ކުންފުންޏަކާއެވެ. މި އެއްބަސްވުމުގައި ވުޒާރާގެ ފަރާތުން ސޮއިކުރެއްވީ ސްޓޭޓް މިނިސްޓަރި އިބްރާހިމް އާމިރެވެ. ނޫރައްދީން އިންވެސްޓްމަންޓް ފަރާތުން އެއްބަސްވުމުގައި ސޮއިކުރެއްވީ އެ ކުންފުނީގެ މެނޭޖަރު އަލީ ނޫރައްދީނެވެ.
އައްޑޫ ސިޓީ ޒޯން ސްޓޭޑިއަމް މަރާމާތުކުރުމަށް ނޫރައްދީން އިންވެސްޓްމަންޓާ ހަވާލުކުރީ އެއް މިލިޔަން ހަތަރު ލައްކަ ފަންސާސްހާސް ރުފިޔާއަށެވެ. މި މަސައްކަތް ނޫރައްދީން އިންވެސްޓްމަންޓާ ހަވާލުކުރީ މަސައްކަތް ފަށާތާ 30 ދުވަހުގެ ތެރޭގައި ނިންމަން ޖެހޭގޮތަށެވެ. މާނައަކީ، މި މަސައްކަތް އަންނަ މަހުގެ ތެރޭގައި ނިންމަން ޖެހޭނެއެވެ.
އައްޑޫ ޒޯން ސްޓޭޑިއަމްގައި ބައިނަލްއަގްވާމީ މެޗުތަކެއް މީގެ ކުރިން ކުޅެފައިވެއެވެ. އޭގެ ތެރޭގައި 2014 ވަނަ އަހަރު އޮތް އޭއެފްސީ ޗެލެންޖް ކަޕުގެ އެއް ގްރޫޕުގެ މެޗުތައް ހިމެނެއެވެ. އަދި އޭގެ އިތުރުން 2015 ވަނަ އަހަރުގެ ގައުމީ ފުޓްބޯޅަ މުބާރާތުގެ ބައެއް މެޗުތައްވެސް އެ ސްޓޭޑިއަމްގައި ކުޅުނެވެ.
އައްޑޫ ޒޯން ސްޓޭޑިއަމްގެ ނަމުން ކުރިން ނަން ދެވިފައިވާ އެ ސްޓޭޑިއަމްގެ ނަން، އައްޑޫ ފުޓްބޯޅަ ސްޓޭޑިއަމްއަށް ބަދަލުކުރީ ރައީސް ޔާމީންގެ ވެރިކަމުގައި 2014 ވަނަ އަހަރު އެވެ.
