މިނިސްޓަރު އަބްދުﷲ މުއްތޮލިބު "އެކްސް" ގައި ކުރެއްވި ޕޯސްޓެއްގައި ވިދާޅުވީ މި ސަރުކާރު ހަވާލުވިއިރު ހުއްޓިފައިވާ 64 މަޝްރޫއަކީ އެމްޓީސީސީ އަދި އާރުޑީސީއާ ޙަވާލުކުރެވި މަސައްކަތް ފެށި ހުއްޓިފައިވާ މަޝްރޫޢުތަކެއް ކަމަށެވެ. މީގެ ތެރެއިން 32 މަޝްރޫއެއްގެ މަސައްކަތް އަލުން ފެށިފައިވާ ކަމަށް މުއްތޮލިބު ވިދާޅުވި އެވެ.
މިނިސްޓަރު މުއްތޮލިބް ވިދާޅުވި ގޮތުގައި، ފެނަކަ ކޯޕަރޭޝަން، އެމްޑަބްލިއުއެސްސީ އަދި އަމިއްލަ ކުންފުނިތަކާ ޙަވާލުކުރެވިފައިވާ ވަރަށް ގިނަ މަޝްރޫއުތަކެއްވެސް ހުރީ ނުފެށި ނުވަތަ މަސައްކަތް ހުއްޓިފައެވެ. ސަރުކާރުގެ އަމާޒަކީ ހުއްޓިފައިވާ ހުރިހާ މަޝްރޫއެއް ވީހާވެސް އަވަހަކަށް ފެށުން ކަމަށްވެސް އެމަނިކުފާނު ވިދާޅުވި އެވެ.
މިނިސްޓަރު މިހެން ވިދާޅުވެފައިމިވަނީ ކުރީ ސަރުކާރުން ފަށާފައިވާ މަޝްރޫއުތަކުގެ ތެރެއިން 70 ނުވަތަ 80 ޕަސެންޓް މަސައްކަތް މިސަރުކާރުން ހުއްޓާލާފައިވާ ކަމަށް ކުރީގެ ރައީސް އިބްރާހިމް މުހައްމަދު ސޯލިހު ރޭ ވިދާޅުވުމާ ގުޅިގެންނެވެ.
