މި މަހުގެ 31 ވަނަ ދުވަހު އިންތިހާބު ބާއްވަން އެފްއޭއެމުން މަސައްކަތް ކުރަމުންދާއިރު، އެ އިންތިހާބުގައި ވާދަކުރަން ފޯމް ހުށަހެޅި، ކުރީގެ އެއްވަނަ ފޯވާޑު އަހްމަދު ތޯރިގު- ޓޮމްގެ ކެންޑީޑޭސީ ބަލައި ނުގަންނަން އެފްއޭއެމްގެ އިލެކްޓޯރަލް ކޮމިޓީން ނިންމާފައިވާއިރު، އެ ކޮމިޓީގެ ނިންމުން ޓޮމްގެ ފަރާތުން އެޕީލް ކުރަން ހުށަހަޅާފައިވާއިރު، ދިމާވެގެން އުޅޭ މައްސަލައަކީ، އެފްއޭއެމްގެ އިންތިހާބީ ގަވައިދުގައި ބުނާ އިލެކްޓޯރަލް ކޮމިޓީ ނެތުމެވެ.
އެފްއޭއެމްގެ އިންތިހާބު ގަވައިދު ނުވަތަ އިލެކްޓޯރަލް ކޯޑުގައި ގައިވާ ގޮތުން، އިންތިހާބީ ކޮމިޓީއާއެކު ތިން މެންބަރުންގެ މައްޗަށް އެކުލެވޭ އެޕީލް ކޮމިޓީއެއްވެސް ކޮންގްރެސްގައި އިންތިހާބު ކުރަން ޖެހެއެވެ. މީގެ ތެރެއިން އެކަކީ ގާނޫނީ ތަމްރީނު ލިބިފައިވާ މެންބަރެއް ކަމަށްވާން ޖެހޭނެ ކަމަށް އިލެކްޓޯރަލް ކޯޑުގައި ބުނެފައިވެއެވެ. އެހެންނަމަވެސް މިދިޔަ އަހަރު އޮތް ކޮންގްރެސްގައި މި ކޮމިޓީ އިންތިހާބުކޮށްފައެއް ނުވެއެވެ.
އިލެކްޓޯރަކް ކޯޑުގައިވާ ގޮތުން އެޕީލާ މެދު ގޮތެއް ނިންމުން އޮތީ، އެޕީލް ހުށަހަޅާ ދުވަހުން ފެށިގެން ތިން ދުވަހުގެ މުހުލަތެކެވެ. އަދި އެ ނިންމުމަކީ އެންމެ ފަހުގެ ނިންމުން ކަމަށް އިލެކްޓޯރަލް ކޯޑުގައި ސާފުކޮށް ބަޔާންކޮށްފައިވެއެވެ.
އިލެކްޓޯރަލް ކޯޑުގައިވާ އެޕީލް ކޮމިޓީއާ ގުޅޭ ގޮތުން ތަކުރާރުކޮށް ސުވާލު ކުރުމުންވެސް އެފްއޭއެމުން ޖަވާބެއް ނުދެއެވެ. އެކަމަކު، އެންމެ ފަހުން އޮތް އެފްއޭއެމްގެ ކޮންގްރެސްގެ ޔައުމިއްޔާގެ ކޮޕީއެއް ސީއެންއެމަށް ލިބިފައިވާއިރު، އެޕީލް ކޮމިޓީއެއް ކޮންގްރެސްގައި އިންތިހާބުކޮށްފައި ނުވާކަން އެ ޔައުމިއްޔާއިން އެނގެއެވެ.
އެހެންކަމުން މިހާރު އުފެދިފައިވާ ސުވާލަކީ، ގަދަ ހަދާފައި ބާއްވަން މަސައްކަތް ކުރާ އެފްއޭއެމްގެ އިންތިހާބު ހަމަ ރަނގަޅަށްވެސް އަތަށް ގޮވީހެއްޔެވެ؟
