ހުސްވެފައިވާ މާލޭ މޭޔަރުގެ މަގާމަށް ބޭފުޅަކު އިންތިހާބު ކުރުމަށް މިއަދު ބޭއްވި އިންތިހާބުގެ ވަގުތީ ނަތީޖާ ދައްކާގޮތުން 7600އެއްހާ ވޯޓާއެކު އިންތިހާބު ކާމިޔާބު ކުރައްވާފައިވަނީ އާޒިމް އެވެ.
އާޒިމްއާ އެންމެ ގާތުން ވާދަކުރެއްވި އާޒިމާއަށް ލިބިވަޑައިގަތީ 4000އެއްހާ ވޯޓެވެ.
މި ނަތީޖާއާއެކު އާޒިމާ ވަނީ އޭނާގެ އެކްސްގައި ކުރެއްވި ޕޯސްޓެއްގައި އާޒިމަށް މަރުހަބާ ވިދާޅުފަ އެވެ.
އާޒިމާ ވިދާޅުވީ ވަކި ސިޔާސީ ފިކުރަކަށް ނުބަލާ މާލެ ރައްޔިތުންގެ ތަރައްގީއަށް އާޒިމްގެ މޭޔަރު ކަމުގެ ދަށުން ކުރައްވާ ކޮންމެ ކަމެއްގައި އެއްބާރުލުން ދޭން ތައްޔާރަށް ހުންނެވި ކަމަށެވެ.
މާލޭ މޭޔަރު އިންތިހާބުގައިި ދެން އެންމެ ގާތުން ވާދަކުރެއްވީ 2200އެއްހާ ވޯޓާއެކު ޑިމޮކްރެޓްސްގެ ކެންޑިޑޭޓް މުހައްމަދު ސައިފް އެވެ. ސައިފް ވެސް ވަނީ ބަލި ގަބޫލުކުރައްވާ އާޒިމަށް މަރުހަބާ ދަންނަވާފަ އެވެ.
މި އިންތިހާބުގައި ޔާމީންގެ ތާއީދާއެކު އަމިއްލަ ގޮތުން ވާދަކުރެއްވި ހުސެއިން ވަހީދަށް ލިބިވަޑައިގެންނެވީ 1800އެއްހާ ވޯޓެވެ. އަދި އަމިއްލަ ގޮތުން ވާދަކުރެެއްވި ޝުއައިބު އަލީއަށް ލިބިވަޑައިގަތީ 117 ވޯޓެވެ.
