މިއަދު ބޭއްވި ޕްރެސް ކޮންފަރެންސަށް ނޫސްވެރިންނާ ވަކިން ވާހަކަ ދައްކަވަމުން މިނިސްޓަރު ވިދާޅުވީ އެ މީހުން ގެނައީ ތުރުކީ މަގުން މިއަދު ފަތިހު ކަމަށެވެ.
އިހުސާން ވިދާޅުވީ ސީރިޔާގައި ރިބީ ދިވެހިންކަން ކަށަވަރުވި ހިސާބުން އެ ހުރިހާ އެންމެން ރާއްޖެ ގެނައުމަށް ރައީސް ޑރ. މުހައްމަދު މުއިއްޒުގެ އިރުޝާދުގެ ދަށުން މި މީހުން ރާއްޖެ ގެނައުމަށް ހާއްސަ މަސައްކަތްތަކެއް ކުރެވުނު ކަމުގައި އިހުސާން ވިދާޅުވި އެވެ. އެގޮތުން މިކަމަށް ބޭނުންވާ ފަންޑު ހޯދައި ހާއްސަ ފްލައިޓެއް 15 މީހުންގެ ޓީމަކާ އެކުގައި މިދިޔަ އާދިއްތަ ދުވަހު ތުރުކީ އަށް ފޮނުވާލި ކަމަށް ވެސް އޭނާ ވިދާޅުވި އެވެ.
ސީރިއަށް ގޮސް ހާލުގައި ޖެހިފައިތިބި ފަސް އާއިލާއެއް މިއަދު ހެނދުނު ވަނީ މާލެ ގެނެސްފަ އެވެ.
އިހުސާން އިތުރަށް ވިދާޅުވީ، އެނބުރި ރާއްޖެ އަންނަން ބޭނުންވާ 90 މީހުން މިހާރު ވެސް ސީރިއާގައި އެބަތިބި ކަމަށެވެ. އެ މީހުން އަނބުރާ ގެންނަން، އެއީ ދިވެހީންކަން ކަށަވަރުކުރުމުގެ މަސައްކަތް ކުރިއަށްދާ ކަމަށް އޭނާ ވިދާޅުވިއެވެ.
މިނިސްޓަރު ވިދާޅުވީ ހަނގުރާމައަށް ގޮސް އަންނަ ހުރިހާ މީހުން ވެސް އަނބުރާ މުޖުތަމައުއަށް ނެރެން ކުރާ ހަރަދުތައް ވެސް ކުރާނީ ސަރުކާރުން ކަމަށެވެ.
މިނިސްޓަރު ވިދާޅުވީ، ސީރިއަށްދާ މީހުން އާންމުކޮށް ދާ ކަމަށް ފާހަގަކުރެވެނީ އާއިލާގެ ކޮންމެ ވެސް އެއް މެންބަރެއްގެ ނުފޫޒުގައި ކަމަށެވެ.
މިނިސްޓަރު ވަނީ ހަނގުރާމައަށް ދިޔަ ދިވެހިންގެ ތެރޭގައި ކުޑަކުދިން ގިނަ ކަމަށާއި އެ ކުދިން އެތަނަށް ގެންދިޔައީ އެ ކުދިންގެ މައިންބަފައިން ކަމަށްވާތީ އެ ކުދިން އެއީ ކުށްވެރިންގެ ގޮތުގައި ނުދެކުމަށް މުޖުތަމައުގެ ކިބައިން އެދިވަޑައިގެންފަ އެވެ. އަދި އެ ކުދިންގެ ޕްރައިވަސީ ރާއްކާތެރިކުރުމުގެ މަސައްކަތް ކުރުމުގައި އެހީތެރިކަން ދިނުމަށްވެސް އެދިވަޑައިގެންފައިވެ އެވެ.
އިހުސާން ވިދާޅުވީ ރާއްޖެ ގެންނަ އެއްވެސް ދިވެއްސެއްގެ ފަރާތުން އެއްވެސް ކަހަލަ ބިރުވެރިކަމެއް ނޯންނާނެ ކަމުގެ ޔަގީންކަން ދިވެހި ރައްޔިތުންނަށް އަރުވާ ކަމަށެވެ.
