ސީރިއާގައި ހަނގުރާމައަށް ގޮސް ތިއްބާ ހާލުގައި ޖެހުނު 21 ދިވެއްސަކު މިއަދު ވަނީ ރާއްޖެ ގެނެސްފަ އެވެ. އެއީ ހަ މީހަކާއި 15 ކުޑަ ކުއްޖެކެވެ. އެ މީހުން ސަރުކާރުގެ އެހީގައި ރާއްޖެ ގެނައުމަށްފަހު އެ މީހުން މިހާރު ތިބީ ރިހެބިލިޓޭޝަން ސެންޓަރުގެ ބެލުމުގެ ދަށުގަ އެވެ.
މިއަދު ބޭއްވި ނޫސްވެރިންގެ ބައްދަލުވުމުގައި މިނިސްޓަރު އިހުސާން ވިދާޅުވީ އެ މީހުން، ހިންމަފުށީގައި ހުންނަ 'ނެޝަނަލް އިންޓަގްރޭޝަން ސެންޓަރު'ގެ ބެލުމުގެ ދަށަށް މިހާރު ވަނީ ގެންގޮސްފަ އެވެ. މިއަދު ގެނައި މީހުންގެ މެޑިކަލް އެސެސްމަންޓެއް ހެދި އިރު އެއްވެސް ބޮޑު ބަލިމަޑުކަމެއް ނެތްކަން ކަށަވަރުވެފައިވާ ކަމަށް އޭނާ ވިދާޅުވި އެވެ.
މީގެ ކުރިން ސީރިއާއިން ދިވެހި އެއް އާއިލާއެއް ރާއްޖެ ގެނެސް ހިންމަފުށީގައި ހުންނަ އިންޓަގްރޭޝަން ސެންޓަރުގައި ބައިތިއްބައިގެން ފަރުވާ ދެވި މިހާރު މުޖްތަމައަށް ދޫކޮށްލެވިފައިވާކަމަށާއި އެ އާއިލާގެ ކަންކަން ފަސް އަހަރަށް ގާތުން ބަލާނެކަން ވެސް މިނިސްޓަރު ފާހަގަ ކުރެއްވިއެވެ.
އަދި ހަމަ އެހެންމެ މިނިސްޓަރު ވަނީ ދުނިޔޭގެ އެކި ގައުމުތަކުގައި މި މަސައްކަތް ވަރަށް ފުޅާ ދާއިރާއެއްގައި ކުރެވޭ ކަމަށާއި ސަކްސެސްފުލީ ވަަރަށް ގިނަ ގައުމުތަކުގައި ރިހެބިލިޓޭޓް ކުރެވި ރިއިންޓަގްރޭޓް ކުރެވިފައިވާ ކަމަށް ވިދާޅުވެފަ އެވެ.
މިދިޔަ ސަރުކާރުން ވަނީ އެކި ގޮތްގޮތުން ސީރިޔާގެ ކޭމްޕުތަކުގައި ތިބި ދިވެހިން އަނބުރާ ގެނައުމުގެ މަސައްކަތް ފަށާފައެވެ. މިއަދު ފަސް އާއިލާއެއް ސީރިޔާއިން އަނބުރާ ރާއްޖެ ގެނެސްފައިވާއިރު އެ އާއިލާތައް ގެނައުމަށް ސަރުކާރުން ވަރަށް ގިނަ މަސައްކަތް ކުރަން ޖެހުނު ކަމަށް ވެސް މިނިސްޓަރު ވަނީ ވިދާޅުވެފަ އެވެ.
