"ޗައިނާ ޑެއިލީ" ގައި ޝާއިޢު ކޮށްފައިވާ ލިޔުމެއްގައި ވަނީ، ރައީީސް ޑރ. މުހައްމަދު މުއިއްޒުގެ ޗައިނާ ދަތުރުފުޅު ނިންމަވާލެއްވިތާ ގިނަ ދުވަސްތަކެއް ނުވެ، ވަކި ތާރީހެއްގެ ކުރިން ރާއްޖޭގައި ތިބި އިންޑިއާ ސިފައިން ބާލަން އެދުމާއެކު، އެއީ ޗައިނާއިން ވާގިވެރި ވެގެން ރާއްޖެއިން އެދުނު އެދުމެއް ކަމަށް އިންޑިއާއިން އަޑު ފަތުރަމުންދާ ކަމަށެވެ.
އަދި 88 ސިފައިންނަކީ ނުރައްކާވެދާނެ ފަދަ އަދަދެއް ނޫން ކަމަށާއި، ޗައިނާގެ ރޭވުމަކީ އިންޑިއާ ސިފައިން ބޭލުމަށް ފަހު ޗައިނާ ސިފައިން ރާއްޖޭގައި ބޭތިއްބުން ކަމަށް އިންޑިއާގެ ޓީވީ ޗެންލަކުން ރިޕޯޓް ކޮށްފައި ވާ ކަމަށް ވެސް ޗައިނާ ޑެއިލީގެ ލިޔުމުގައިވެ އެވެ.
ނަމަވެސް ރައީސް ޑރ. މުއިއްޒު ވެރިކަމަށް ވަޑައިގަތީ ބޭރުގެ އެއްވެސް ގައުމެއްގެ ސިފައިންނަށް ރާއްޖޭގެ ފަސްގަނޑު މަތީގައި ނުތިބެވޭނެކަން ކަށަވަރު ކޮށްދިނުމަށް ކަން، އެފަދަ ވާހަކަތައް ފަތުރާ އިންޑިއާގެ ފަރާތް ތަކަށް އެނގެން ޖެހޭ ކަމަށް އެ ލިޔުމުގައި ބުނެފައިވެ އެވެ.
މީގެއިތުރުން އިންޑިއާގެ ލަކްޝަދީބު ޕްރޮމޯޓް ކުރުމުގެ ނަމުގައި އެ ގައުމުގެ ބޮޑުވަޒީރު ނަރެންދްރަ މޯދީ މީސް މީޑިއާގައި ހިއްސާ ކުރައްވާފައިވާ ފޮޓޯ ތަކަކީ، ރާއްޖެ ޒިޔާރަތް ކުރާ އެ ގައުމުގެ ފަތުވެރިންގެ އަދަދު ދައްކުރުމުގެ ނިޔަތުގައި ކުރެއްވި ކަމެއްގެ ގޮތުގައި އެ ލިޔުމުގައި ސިފަކޮށްފައިވެ އެވެ.
ޗައިނާ ޑެއިލީގެ އެ ލިޔުމުގައި އިތުރަށް ބުނެފައިވަނީ، އިންޑިއާއަށް އަބަދުވެސް ހީވެފައި އޮންނަނީ މުޅި އިންޑިއާ ކަނޑުގެ ސަރަހައްދަކީ އެ ގައުމުގެ ބާރުގެ ދަށުގައިވާ ތަނެއް ކަމަށެވެ. އެގޮތުގެ މަތިން ސިޔާސީ ގޮތުންނާއި އިގްތިސޯދީ ގޮތުން ވެސް ރާއްޖޭގެ މައްޗަށް ބާރު ފޯރުވެން ޖެހޭނެ ކަމަށް އިންޑިއާއިން ދެކޭ ކަމަށް ވެސް ބުނެ، އެ ލިޔުމުގައި ވަނީ އިންޑިއާއަށް ފާޑުކިޔުން އަމާޒު ކޮށްފައެވެ.
މާޗް މަހުގެ 15 ވަނަ ދުވަހުގެ ނިޔަލަށް އިންޑިއާ ސިފައިން ރާއްޖެއިން ބޭލުމަށް ދިވެހި ސަރުކާރުން މިހާރު ވަނީ އެދިފައެވެ.
ދިވެހިރާއްޖޭގައި ތިބި ބޭރުގެ ސިފައިން އަނބުރާ ފޮނުވާލުމަކީ ރައީސް މުއިއްޒުގެ ފާހަގަ ކޮށްލެވޭ ބޮޑު ރިޔާސީ ވައުދުފުޅެކެވެ.
