ރާއްުޖެއާއި އަވައްޓެރި އިންޑިއާގެ ގުޅުން ހީނަރުވެފައިވާ ދަނޑިވަޅެއްގައި ފޮރިން މިނިސްޓަރު ޒަމީރު އިންޑިއާގެ އެކްސްޓާނަލް އެފެއާޒް މިނިސްޓަރު ޖައިޝަންކަރާއި ބައްދަލުކުރައްވާފައިވަނީ މިހާރު ޔުގަންޑާގައި ކުރިއަށްދާ ނޮން އެލައިންޑް މޫވްމަންޓް(ނޭމް)ގެ ހަވާސާގެ ތެރެއިންނެވެ.
ބައްދަލުވުމަށް ފަހު މިނިސްޓަރު ޒަމީރު "އެކްސްް"ގައި ކުރެއްވި ޕޯސްޓެއްގައި ވިދާޅުވީ ދެގައުމުގެ މެދުގައި މަތީފަންތީގެ މަޝްވަރާތަކެއް ކުރެވުނު ކަމަށެވެ.
އޭގެ ތެރޭގައި ރާއްޖޭގައި ތިބި އިންޑިއާ ސިފައިން ފޮނުވާލުމާއި ގުޅޭގޮތުން ވެސް މަޝްވަރާކުރެވުނުކަމަށް މިނިސްޓަރު ވިދާޅުވި އެވެ.
ރާއްޖޭގައި އިންޑިއާއިން ކުރިއަށްގެންދާ މަޝްރޫއުތައް އަވަސްކުރުމަށާއި، ސާކް އަދި ނޭމްގައި އެއްބާރުލުން ދިނުމާއި ގުޅޭގޮތުން މަޝްވަރާކުރެވުނުކަމަށް މިނިސްޓަރު ވިދާޅުވި އެވެ.
އޭގެ އިތުރުން ދެގައުމުގެ ގުޅުން އިތުރަށް ވަރުގަދަކުރުމާއި ގުޅޭ ގޮތުން މަޝްވަރާކުރެވުނެވެ.
