މި ޕްރޮގްރާމަކީ އެ ކައުންސިލުން ކުރިއަށް ގެންދާ ނަމާދަށް އަހުލުވެރި އާ ޖީލެއް ބިނާކުރުން މި މައުލޫގެ ދަށުން ކުރިއަށް ގެންދާ ދެވަނަ ޕްރޮގްރާމެވެ. މި ޕްރޮގްރާމް ކުރިއަށްގެންދިޔުމަށް ހަމަޖެހިފައިވަނީ ޒިކުރާ އިންޓަަރނޭޝަނަލް ކޮލެޖާއި ގުޅިގެންކަމަށް ދާންދޫ ކައުންސިލުން ބުނެއެވެ.
13 އަހަރާއި 14 އަހަރުގެ ކުދިންނަށް ހާއްސަ ކުރާ މި ޕްރޮގްރާމް ގެ މުއްދަތަކީ 15 ދުވަހެވެ. ފެބްރުއަރީ 7 ގައި ފެށުމަށް ހަމަޖެހިފައިވާ މި ޕްރޮގްރާމްގައި ބައިވެރިވުމުގެ ސުންގަޑި އަކީ މި މަހުގެ 31 ވާ ބުދަ ދުވަހުގެ 14:00 އެވެ.
މި ޕްރޮގްރާމްގައި ނަމާދު އަދި ރަވާތިބު ސުންނަތްތައް ވެސް ކިޔާދޭނެ އެވެ.
މި ޕްރޮގްރާމް ގައި ބައިވެރިވުމަށް ބޭނުންފުޅުވާ އެ އުމުރުފުރާގެ ކޮންމެ ފަރާތަކަށްވެސް ބައިވެރިވެވޭނެ އެވެ. މި ޕްރޮގްރާމާއި ގުޅޭ އިތުރު މައުލޫމާތު ބޭނުންފުޅުވެލައްވާނަމަ 7830720 އަށް ގުޅާލުމުން ލިބޭނެ ކަމަށް ވެސް ދާންދޫ ކައުންސިލުން ބުނެއެވެ.
މީގެ އިތުރުން މި ކޯސް ކުރިއަށް ދާއިރު ޖަމާއަތްތެރިކަމުގެ ކޯހެއްވެސް ކުރިއަށް ދާނެކަމަށް އެ ކައުންސިލުން ބުނެ އެވެ.
ޖަމާއަތްތެރިކަމުގެ ކޯހުގައި ދާންދޫގެ އިތުރުން ނިލަންދޫ، ދެއްވަދޫ އަދި ކޮންޑޭ މި ތިންރަށަށް ވެސް ކޮންމެ ރަށަކުން 2 ކުއްޖަކަށް ބައިވެރިވެވޭނެ ކަމަށާއި އަދި އެ އަންނަ ކުދިންގެ ހުރުމާއި ކެއުން ހިލޭ ކައުންސިލުން ހަމަޖައްސައިދޭނެ އެވެ.
މި ސަރުކާރުން ވެސް ރާއްޖޭގައި ދީނީ ކަންކަމަށް ފަރުވާތެރި ޖީލެއް ބިނާ ކުރުމަށް ދަނީ މަސައްކަތްތަކެއް ކުރަމުންނެވެ. އެ ގޮތުން އަންނަ ފެބްރުއަރީ މަހުގައި ފެށުމަށް ހަމަޖެހިފައިވާ ރާއްޖޭގެ ހުރިހާ މިސްކިތްތަކުގެ އިމާމުން ތަމްރީން ކުރުމުގެ ގައުމީ މަޝްރޫއު ފާހަގަ ކޮށްލެވެއެވެ.
