ރައީސް ޔާމީން މިހެން ވިދާޅުވީ އެމަނިކުފާނު އުފައްދަވަން މަސައްކަތް ކުރައްވާ ޕީޕަލްސް ނޭޝަނަލް ފްރޮންޓް
(ޕީއެންޕީންް ) ރޭ ބޫއްވި އެއްވުމެއްގައި ވާހަކަދައްކަވަމުންނެވެ.
ވ އާރަށް ކުއްޔަށްދިން މައްސަލާގައި ރިޝްވަތުގެ ކުށް ސާބިތުވެ 11 އަހަރުގެ ޖަލު ހުކުމެއް ތަންފީޒުކުރަމުން ގެންދަވާ ރައީސްް ޔާމީން މިވަގުތު ގޭ ބަންދެއްގައި ހުރ ނަމަވެސް ސިޔާސީ ހަރަކާތްތަކުގައި ބައިވެރިވުން ކަރެކްޝަނުން ވަނީ މަނާކޮށްފައެވެ. އެހެންނަމަވެސް އެ ނިންމެވުމަށް ގޮންޖައްސަވާ ޕީއެންޕީ ބާއްވާ ބައްދަލުވުންތަކުގައި ދަނީ ބައިވެރިވަމުންނެވެ. އަދި މިހާރު އެ ބައްދަލުވުންތަކުގައި ބައިވެރިވެ ސުވާލުކުރެއްވުމުގެ ނަމުގައި ވާހަކަވެސް ދައްކަވައެވެ.
ރައީސް ޔާމީން ދީފައިވާ ލުއިތައް އަލުން ރިވިއުކުރަމުންދާކަމަށް ކަރެކްޝަނުން ތަކުރާރުކޮށް ބުނެފައިވެއެވެ. އެހެންނަމަވެސް މިހާތަނަށް އެއްވެސް ފިޔަވަޅެއް އަޅާފައެއް ނުވެއެވެ.
ރޭ ޕީއެންޕީން ބޭއްވި ބައްދަލުވުމުގައި ރައީސް ޔާމީން ވަނީ އެމްއެމްޕީއާރުސީ މައްސަލާގައި މިދިޔަ ސަރުކާރަށާއި މި ސަރުކާރަށް ވަރަށް ބޮޑަށް ފާޑު ވިދާޅުވެފައެވެ. އެގޮތުން މި ސަރުކާރުންވެސް ހިޔާނާތުގައި ގެއްލުނު ފައިސާ ހޯދަން ނޫޅޭކަމަށްވެސް ރައީސް ޔާމީން ވިދާޅުވިއެވެ. މި ސާރުކާރުން ކެމްޕެއިން ތެރޭ އެވާހަކަ ދެއްކުމަށްފަހު މިހާރު އެވާހަކަ ނުދައްކާކަމަށްވެސް ރައީސް ޔާމީން ވިދާޅުވިއެވެ.
ރައީސް ޔާމީން ވިދާޅުވީ މައްސަލާގައި ހިމެނުނު އަދީބަށް ހުކުމް އިއްވުމަށްފަހު 4 އަހަރު ނުވަނީސް މިނިވަންވެފައިވާކަމަށެވެ. އެހެންނަމަވެސް ރިޝްވަތުގެ މައްސަލައެެއްގައި އެމަނިކުފާނު ޖަލުގައި ހުންނަވާތާ 3 އަހަރުވެފައިވާކަމަށް ޔާމީން ވިދާޅުވިއެވެ. އަދި ރާއްޖޭގައި ރިޝްވަތުގެ ފައިސާ މަނިލޯންޑިރިންނަށް ހަދާ މަނީލޯންޑިރިން ބޮޑު ޤައުމެއްގެ ގޮތުގައި ދައްކަމުން އަންނަކަމަށްވެސް ރައީސް ޔާމީން ވިދާޅުވިއެވެ.
ރާއްޖޭގެ ފަހުގެ ތާރީހުގައި ހިންގި އެންމެ ބޮޑު ހިޔާނާތް އެމްއެމްޕީއާރުސީގެ ހިޔާނާތް ހިންގާފައިވަނީ ރައީސް ޔާމީންގެ ވެރިކަމުގައެވެ. އެކަމުގެ މައުލޫމާތު ލިބިގެން އެވާހަކަތައް އޭރު އޮޑިޓަރ ޖެނެރަލް އިބްރާހިމް ނިޔާޒު ރައީސް ޔާމީންނަށް އެންގެވުމުން އެކަމާއި އެމަނިކުފާނު އަޅާ ނުލެއްވިކަމަށް އޭރުގެ އޮޑިޓަރ ޖެނެރަލް ވަނީ ވިދާޅުވެފައެވެ.
އެމްއެމްޕީއާރުސީން އެތައް ބިލިއަން ދިވެހި ރުފިޔާއަކަށް ހިޔާނާތްތެރިވިކަން އެނގުނީ ރައީސް ޔާމީނާ އޭރުގެ އެންމެ އަރިސްކޮށް އުޅުއްވި ނައިބް ރައީސް އަހްމަދު އަދީބާ ދެ ބޭފުޅުން މައްސަލަ ޖެހުނު ހިސާބުންނެވެ. އޭގެކުރިން އެކަމާއި ގުޅިގެން ދެއްކި އެއްވެސް ވާހަކައަކަށް ރައީސް ޔާމީން ފިޔަވަޅު އަޅުއްވާފައެއް ނުވެއެވެ.
