މަޖިލިސް އިންތިހާބު ބާއްވަން ހަމަޖެހިފައި ވަނީ މާޗް 17 ގަ އެވެ. އެއީ ރޯދަ މަހުގެ ފުރަތަމަ ހަފުތާތެރެ އެވެ
މަޖިލިސް އިންތިހާބަށް އިލެކްޝަންސް ކޮމިޝަން (އީސީ) އިން އެކުލަވައިލި ގައުމީ ލަފާދޭ ކޮމިޓީން ދަރުބާރުގޭގައި މިއަދު ބޭއްވި ބައްދަލުވުމުގައި ޝިޔާމް ވިދާޅުވީ ރޯދަމަހު އިންތިހާބު ބާއްވާ ގޮތަށް ކޮމިޝަނުން ނިންމީ އެއްވެސް ސިޔާސީ ޕާޓީއަކުން އެއްބަސްވެގެން ނޫން ކަމަށެވެ.
އަދި މިހާރު ވެސް އެ ތާރީހު ބަދަލުކުރުމުގެ ފުރުސަތު އެބައޮތްކަމަށް ފާހަގަކުރެއްވި އެވެ. އެކަމަށް ދަ ޑިމޮކްރެޓުން ވެސް މިއަދު ވަނީ ތާއީދުކޮށްފަ އެވެ.
މިއަދު ބޭއްވި އިންތިހާބަށް ލަފާދޭ ކޮމިޓީގެ ބައްދަލުވުމުގައި އީސީގެ ނައިބު ރައީސް އިސްމާއީލް ހަބީބު ވިދާޅުވީ މަޖިލިސް އިންތިހާބުގެ ވޯޓުުން ކުރިއަށް ގެންދަން ހަމަޖެހިފައި ވަނީ ވޯޓުލާ މީހުންނަށް ވީހާވެސް ފަސޭހަ ވާނެ ގޮތަކަށް ކަމަށާއި ވޯޓްލާ ގަޑިއަކަށް ކަނޑައަޅާފައި ވަނީ ހެނދުނު 9:00 އިން ހަވީރު 5:00 އާ ކަމަށެވެ.
ހަބީބު ވިދާޅުވީ ރޯދަމަހާ ދިމާވާ ގޮތަށް ނިންމަން ޖެހުނީ އެކަޑަމިކް ކަލަންޑަރަށް ސަރުކާރުން ގެނައި ބަދަލަކާ ގުޅިގެން ކަމަށެވެ.
ގައުމީ ލަފާދޭ ކޮމިޓީގެ ހުށަހެޅުންތަކަށް ބަލައި، ގޮތް ނިންމާނީ އިލެކްޝަންސް ކޮމިޝަނުންނެވެ.
ކުރިއަށް އޮތް މަޖިލިސް އިންތިހާބުގައި ޖުމްލަ 284،372 މީހުންނަށް ވޯޓުލުމުގެ ހައްގު ލިބިގެންވެ އެވެ. އަދި މަޖިލިސް އިންތިހާބުގައި 93 ދާއިރާއަށް މެންބަރުން ހޮވާނެ އެވެ.
