މިއަދު އިސްލާމީ ކަންތައްތަކާއި ބެހޭ ވުޒަރާގައި ބޭއްވި ރަސްމިއްޔާތެއްގައި އެތަނުގައި ހިލޭ މިސްކިތެއް އެޅުމަށް އެ ވުޒާރާގެ ފަރާތުން ސޮއި ކުރެއްވީ މިނިސްޓަރު ޑރ. މުހައްމަދު ޝަހީމް އަލީ ސައީދެވެ. އެސްޖޭގެ ފަރާތުން މި އެއްބަސްވުމުގައި ސޮއި ކުރެއްވީ އެ ކުންފުނީގެ ޑިރެކްޓަރ ޝިހާދު އިބްރާހިމެވެ.
މިއަދު އެސްޖޭ ކޮންސްޓްރަކްޝަންއާ އެކު މިވީ އެއްބަސްވުމުގެ ދަށުން އެ ކުންފުނީގެ އަމިއްލަ ހަރަދުގައި ޒިކުރާ މިސްކިތް ތިން ބުރިއަށް އިމާރާތް ކުރާނެ އެވެ.
ޒިކުރާ މިސްކިތް ހުރި ބިމުގައި މިހާރު 500 މީހުންގެ ޖާގައިގެ ވަގުތީ މިސްކިތެއް ހުރެ އެވެ.
ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ ވެރިކަމުގައި 2018 ވަނަ އަހަރު ވެސް ޒިކުރާ މިސްކިތް ހުރި ބިމުގައި މިސްކިތަކާ އެކު 10 ބުރީގެ އޮފީސް އިމާރާތެއް އަޅަން ހަވާލުކުރިއެވެ. އެކަމަކު، އެ އެއްބަސްވުން ނިމުނު ސަރުކާރުގައި ވަނީ ބާތިލުކޮށްފަ އެވެ.
ޒިކުރާގެ މިސްކިތުގެ އިތުރުން ވެސް، އަމިއްލަ ހަރަދުގައި އިތުރު ދެ މިސްކިތެއް އިމާރާތްކުރަން މިއަދު ވަނީ އެއްބަސްވުމުގައި ސޮއިކޮށްފައެވެ. ހުޅުމާލޭގައި އިމާރާތްކުރާ އެ ދެ މިސްކިތުގެ މަސައްކަތް ކުރަން އެއްބަސްވުމުގައި ސޮއިކުރީ އަލީމް ފައުންޑޭޝަނާއި ލިސާ މޯލްޑިވްސްއެވެ.
ހުޅުމާލޭގައި އިމާރާތްކުރާ ދެ މިސްކިތަކީ 2000 ނުވަތަ 3000 މީހުންގެ ޖާގައިގައި މިސްކިތްތަކެއް ކަމަށް ޝަހީމް މިއަދު ވިދާޅުވި އެވެ.
