Advertisement

މިއަދަކީ ރާއްޖޭގެ ތާރީހުގައި ދުށް އެންމެ ބޮޑު ކާރިސާއަށް 15 އަހަރު ފުރުނު ދުވަހެ އެވެ. ސުނާމީ ކާރިސާ އާއި ގުޅިގެން ރާއްޖޭގެ ހަތަރު ރަށެއް ވަނީ ފަޅުވެފަ އެވެ. އޭގެ ތެރެއިން އެއް ރަށަކީ ސުނާމީގައި އެންމެ ބޮޑަށް ގެއްލުނު ލިބުނު ތ. ވިލުފުއްޓެވެ.

ސުނާމީ ކާރިސާއާ ގުޅިގެން ވިލުފުށީ މީހުން ވަގުތީގޮތުން ބުރުންޏަށް ބަދަލުކޮށްފައިވެ އެވެ. އެހެންނަމަވެސް ވިލުފުށި ތަރައްގީ ކުރުމަށްފަހު އަލުން ވަނީ ވިލުފުށީ ރައްޔިތުން އެ ރަށަށް ބަދަލުކޮށްފަ އެވެ.

ސުނާމީ ކާރިސާއަށް 15 އަހަރު ފުރިގެން ދިޔައިރު ތ. ވިލުފުށީގެ ގިނަ އާއިލާތަކަށް އެންމެ އެކަށީގެންވާ ބޯހިޔާވެހިކަމެއް ލިބަފައި ނުވާކަމުގެ ޝަކުވާ އެރަށުގެ ބައެއް ރައްޔިތުން ކުރެ އެވެ. ވިލުފުށީގައި މީހުން އަލުން އާބާދުކުރެވުނު އިރު ރަށުގެ ބިމުގެ ތަނަވަސްކަން ކިތަންމެ ބޮޑުވެގެން ދިޔަނަމަވެސް، ލިބުނު ގޯތިތައް ކުޑަކަން އެ ރަށު ރައްޔިތުން ފާހަގަކުރެ އެވެ.

ސުނާމީގެ ކުރިން ބައެއް އާއިލާތައް ދިރިއުޅެމުން ދިޔައީ ގާތްގަނޑަކަށް 2000 އަކަފޫޓުގެ ގޯއްޗެއްގަ އެވެ. އެހެން ނަމަވެސް މިހާރު ބޮޑެތި އާއަލާތަށް ދިރިއުޅެން ޖެހިފައިވަނީ 3 ކޮޓަރީގެ ކުޑަ ގެއެއްގަ އެވެ. ޒުވާން އާއިލާތައް ވަނީ މަގުމަތި ވެފަ އެވެ. 12 މީހުން ތިބި ބައެއް އާއިލާތަކަށް ލިބަފައިވަނީ 3 ކޮޓަރީގެ އެންމެ ގެއެކެވެ. އަދި ލިބިފައިވާ ގޯތީގައި އިތުރު އިމާރާތެއް ކުރުމަށް ޖާގައެއް ނެތެވެ.

ނަމަވެސް އާއިލާތައް މިއަދު ބޮޑުވެގެން ގޮސްފައިވާއިރު އެ ފަރާތްތަކަށް ބޯހިޔާވެހިކަން ލިބިދީފައި ނުވެ އެވެ. އަދި މިގެތައް ބެހުމުގައި އޮޅުވާލުމާ ކޮރަޕްޝަންގެ އަމަލުތައް ހިމެނޭކަމަށް ވިލުފުށީ ރައްޔިތުން ތުހުމަތު ކުރި ނަމަވެސް މި ކަންކަން ބެލިފައެއް ނުވެ އެވެ. ރަށުގައި ފަޅަށްހުރި ގެތައް އިންތިހާއަށް ގިނަ އެވެ. މީގެ ސަބަބަކީ މި ދެންނެވުނު ގޮތަށް ގެތައް ބެހިގެންދިޔުމެވެ. ހައްގުވެރި ފަރާތްތަކުގެ ކިބައިން ހައްގު ނިގުޅައިގެންފައިވުމެވެ.

ވިލުފުށި ސުނާމީއަށް ފަހު އަލުން އާބާދުކުރިއިރު ގެތައް އަޅާފައިވަނީ ވިލުފުށީ ރައްޔިތުން އެދުނު ގޮތަށް ނޫން ކަމަށް އެރަށު ރައްޔިތުން މައުލޫމާތުދެ އެވެ. އެރަށު ރައްޔިތުންގެ އެދުމަކަށްވީ އޭރުވެސް ހުރި ގޯތި އިމާރާތްކޮށްދިނުމެވެ. ނަމަވެސް ގެ އަޅައިފައިވަނީ އެގޮތަކަށް ނޫނެވެ. އަދި ގެ އެޅުމަށްފަހު ގެ ދޫކޮށްފައިވަނީ ގުރުއަތުލައިގެންނެވެ.

ވިލުފުށީ ރައްޔިތުގެ ތެރެއިން މައުލޫމާތު ދިން ފަރާތްތަކުން މައުލޫމާތު ދިން ގޮތުގައި އެރަށުގެ ގެތައް ބަހާފައިވަނީ އާއިލާއެއްގައި 6 މީހުން ތިބި އާއަލާއަކަށް ގެއެއްގެ އުސޫލުންނެވެ. އަދި އިތުރު 6 މީހުން ހަމަވާނަމަ އިތުރު ގެއެއް ދޭ ގޮތަށެވެ. ނަމަވެސް، ޖުމުލަ 11 މީހުން ތިބި ބައެއް އާއިލާތަކަށް 2 ގެ ދީފައި ހަމަ އެ އަދަދަށް މީހުން ތިބި އާއިލާތަކަށް 1 ގެ ދީފައިވާކަން އެރަށު ބައެއް ރައްޔިތުން ފާހަގަކުރެ އެވެ. އަދި އެގޮތަށް ގެ ނުލިބޭ ފަރާތްތަކަށް ވަކިވަކި ކޮޓަރި ދޭން ނިންމާފައިވީ ނަމަވެސް މިއަދާ ހަމައަށް އައިއިރު އެކަން ކޮށްފައެއް ނުވެ އެވެ.

ގިނަ ގެ ހޯދުމުގެ ގޮތުން ގޭގެ ވަގުތީ ރަޖިސްޓްރީގައި ގޭގައި އަސްލު ނުހިމެނޭ އެތައް ބަޔަކު ޖައްސާ އިތުރަށް ގެ ހޯދައިފައިވާ ކަމަށް ވެސް ވިލުފުށީ ބައެއް ރައްޔިތުން މައުލޫމާތުދެ އެވެ. އަދި މިކަން ކޮށްފައިވަނީ ގެ ބެހުމަށްޓަކައި އޭރު ވިލުފުށިން އެކަމާއި ހަވާލުވެ އޮތް ކޮމިޓީން ކަމަށް ވެސް އެރަށު ރައްޔިތުން ތުހުމަތު ކުރެ އެވެ. އަދި ސުނާމީގެ އެހީގެ ގޮތުގައި ވިލުފުށީގެ ކޮންމެ ގެއެކަށް ދިނުމަށް އޭރުގެ ސަރުކާރުން ކަނޑައެޅި 50،000 ރުފިޔާ، ވިލުފުށީ ރައްޔިތަކަށް ލިބިފައި ނުވާކަން އެރަށުގެ ބައެއް ރައްޔިތުން ފާހަގަކުރެ އެވެ.

ގެތަކުގައި މީހުން ވަނީ ތޮއްޖެހިފަ އެވެ. އަމިއްލަ ރަށުގައި އެހެން މީހުންގެ ގެތައް ކުށްޔަށް ނަގައިގެން އުޅެން މަޖުބޫރުވެފަ އެވެ. ގެއެއް އިމާރާތްކުރަން ގޯއްޗެއް ލިބޭނެކަމުގެ އުއްމީދުގައި އެރައްޔިތުން ތިބޭތާ އެތަކެއް އަހަރުތަކެއް ވެއްޖެ އެވެ. އަދިވެސް މިކަމަށް އަލިމަގެއް އެރައްޔިތުންނަށް ފެނިފައެއް ނެތެވެ.

ތ. ވިލުފުއްޓަކީ ސޭފްއައިލެންޑެ ކޮންސެޕްޓަށް ބުރިޓީޒް ރެޑްކްރޮސެންޓުގެ ހިލޭ އެހީގައި ތަރައްގީކޮށްފައިވާ ޒަމާނީ ވަސީލަތްތައް ގާއިމުކޮށްފައިވާ ރަށެއް ނަމަވެސް ބޯ ހިޔާވަހިކަމުގެ މައްސަލައާއި ހެދި މިރަަށުގެ ކުރިއެރުމަށް ވަރަށް ބޮޑު ގޮންޖެހުމެއް ކުރިމަތިވެ އެވެ.

ބޯހިޔާވެހިކަަމަކީ އަސާސީ ހައްގަކަށް ވާއިރު މިހައްގުން އެއްވެސް ފަރާތެއް އެކަހެރި ކުރެވިގެން ނުވާނެ އެވެ. މިކަމަށް އަވަސް ހައްލެއް ބޭނުންވެ އެވެ.

ސުނާމީ ކާރިސާއާއި ގުޅިގެން ފާހަގަކުރެވޭ މިފަދަ ދުވަހެއްގައި މިފަދަ ކަންކަމުގެ ވާހަކަ ދައްކައި އެކަމަށް ހައްލު ހޯދަން މަސައްކަތްކުރުމަކީ ކޮންމެހެން މުހިއްމު ކަމެއް ކަމުގައި ދެކެމެވެ. ހާއްސަކޮށް ގައުމީ ފެންވަރުގައި މިދުވަސް ވިލުފުށީގައި ފާހަގަކުރަމުން ދާއިރު، މިކަންކަން ހަނދާނަށް ގެންނަންޖެހެ އެެވެ.