އެފްކޮންސްއިން ބްރިޖުގެ ސާވޭއަށް ބޭނުންކުރި ޕްލެޓްފޯމެއް ވިލިމާލެ ކައިރީގައި އޮއްވާ، މިދިޔަ އަހަރުގެ އޮގަސްޓް މަހު ރާޅުތަކާއެކު އެ ޕްލެޓްފޯމް ވަނީ ވިލިމާލޭ ފަރަށް އަރައި ބޮޑެތި ގެއްލުންތަކެއް ލިބިފަ އެވެ.

އެ މައްސަލައާއި ގުޅިގެން އީޕީއޭ އާއި އެފްކޮންސްއިން ހެދި ދިރާސާ އަކަށް ފަހު، އީޕީއޭއިން ވަނީ 69.4 މިލިއަން ރުފިޔާއިން އެފްކޮންސް ޖޫރިމަނާކޮށްފަ އެވެ. 

އެފްކޮންސް ޖޫރިމަނާކުރަން އީޕީއޭއިން ނިންމުމާއި ގުޅިގެން އެ ކުންފުނިން އެންވަޔަރަމެންޓް މިނިސްޓްރީގައި އެ މައްސަލަ އިސްތިއުނާފުކުރި އެވެ. ނަމަވެސް މިނިސްޓްރީން ނިންމީ އެފްކޮންސްއިން ދައްކަންޖެހޭ ޖޫރިމަނާ ފައިސަ މައާފުނުކުރުމެވެ.

މީގެއިތުރުން ޖޫރިމަނާގެ އަމުރަށް އަމަލު ކުރުން ފަސްކޮށްދޭން އެދިި އެފްކޮންސްއިން ސިވިލް ކޯޓުގައި އެދުމުން ސިވިލް ކޯޓުން ވަނީ އެފަދަ ވަގުތީ އަމުރެއް ނެރެދެވެން ނެތް ކަމަށް ނިންމާފަ އެވެ.

ބްރިޖުގެ މަސައްކަތުގައި އެފްކޮންސްއިން ބޭނުންކުރި ޕްލެޓްފޯމް ވިލިމާލެ ފަރަށް އެރުމާ ގުޅިގެން އެ ފަރުގެ ހަތަރު ހިސާބަކަށް ޕްލެޓްފޯމްގެ ފައިތައް ވަދެ، އިސްކޮޅަށްވުރެ ފުން ވަޅުގަނޑުތައް ހެދިފައިވެ އެވެ. އަދި އެ ޕްލެޓްފޯމް ފަރުމަތިން ފުންކުރީ ފަރަށް އެރިތާ ދެ ހަފްތާ ފަހުންނެވެ.