ސަރުކާރުން އެފްޑީސީއާ ހަވާލުކޮށްގެން ހަދަމުންދާ ޓަވަރުތަކުގެ ތެރެއިން 10 ޓަވަރުގެ އޮނިގަނޑުގެ މަސައްކަތް ނިންމައި، ހުރިހާ ޓަވަރެއްގައި ސުޕަސްޓްރަކްޗާގެ މަސައްކަތްތައް މިހާރު ދަނީ ކުރަމުންނެވެ.
އެފްޑީސީން މިހާރު ދަނީ އެ މަޝްރޫއު ވީ އެންމެ އަވަހަކަށް ނިންމުމުގެ މަސައްކަތް ކުރަމުންނެވެ. އެގޮތުން ހުޅުމާލޭގައި ހަދަމުންދާ ޓަވަރުތަކުގެ ތެރެއިން ހަތަރު ޓަވަރުގެ މަސައްކަތް މިމަސް ނިމުމުގެ ކުރިން އެއްކޮށް ނިންމާލެވޭނެ ކަމަށް އެ ކުންފުނިން ކުރިން ބުނެފައިވެ އެވެ.
ހުޅުމާލޭގައި، 500 އަށްވުރެ ގިނަ ފްލެޓް ހިމެނޭހެން 32 ޓަވަރު އެޅުމަށް އެފްޑީސީއަށް ވަނީ ހަވާލުކޮށްފަ އެވެ. ކުރީގެ ސަރުކާރުން އެފްޑީސީއާ ހަވާލުކުރި މި މަޝްރޫއު އެ ކުުންފުނިން ކުރިއަށް ގެންދަނީ އިންޑިއާގެ އެންބީސީސީ އާއި ޖޭއެމްސީ ކުންފުންޏާ ހަވާލުކޮށްގެންނެވެ.
މި މަޝްރޫއުގެ ދަށުން އެންބީސީސީ އިން 2،000 ފްލެޓު އަޅާއިރު، ޖޭއެމްސީ ޕްރޮޖެކްޓްސް ލިމިޓެޑުން 2،000 ފްލެޓު އެޅުމަށް ވަނީ ހަމަޖެހިފަ އެވެ.
