އެފްއޭއެމުން ކްލަބުތަކަށް ދޭ ފައިސާގެ މައުލޫމާތު ހޯދުމަށް، ސްޕޯޓްސް ކޮމިޝަނަރުގެ އޮފީހުން ފުރަތަމަ ޑިވިޝަން ކްލަބްތަކަށް، ފޮނުވި ސިޓީގައި ބުނެފައިވަނީ މިދިޔަ ހަތަރު އަހަރު ފީފާ ނުވަތަ އޭއެފްސީން ފަރާތުން އެފްއޭއެމުން މެދުވެރިވެގެން ދިން ފައިސާ ހަރަދުކޮށްފައިވާ ގޮތުގެ ތަފުސީލު އަންނަ އާދިއްތަ ދުވަހުގެ ކުރިން، ސްޕޯޓްސް ކޮމިޝަނަރު އޮފީހަށް ފޮނުވައިދިނުމަށެވެ.
މި ސިޓީއާ ގުޅޭ މައުލޫމާތު އޮޅުންފިލުވަން ފުރަތަމަ ޑިވިޝަނުގެ ބައެއް ކްލަބްތަކުން ވަނީ ކޮމިޝަނާ އޮފް ސްޕޯޓްސްގެ އޮފީހަށް ވެސް ގޮސްފަ އެވެ. އެ ކްލަބްތަކަކީ، ޔުނައިޓެޑް ވިކްޓަރީ (ޔޫވީ)، ބުރު ސްޕޯޓްސް ކްލަބް، ކްލަބް އީގަލްސް އަދި ކްލަބް ގްރީން ސްޓްރީޓްސް ކަމަށްވަނީ މައުލޫމާތު ލިބިފައެވެ.
މި ކްލަބްތަކަކީ އެފްއޭއެމް އިން ބާއްވަން އުޅުނު އިންތިހާބުގައި ވާދަކުރާ، އެއް ކެންޑިޑޭޓް ކަމަށްވާ މުފާވިޒް ހާޝިމް (މުފާ) އަށް ތާއީދުކުރާ ހަތަރު ކްލަބް އެވެ.
