ފެންވަރު ރަނގަޅު ދިވެހި އެތުލީޓުން ބިނާކުރުމަށް ފެށި، ދުރު ރާސްތާ ޕްލޭނުގެ ފުރަތަމަ މަޝްވަރާ ބައްދަލުވުންތައް ހަތް ދުވަހަށް އޮންނާނެއެވެ.
ފުރަތަމަ ބައްދަލުވުމެއްގެ ގޮތުގައި އޮތީ، މި ޕްލޭންގެ އިސް ހަރަކާތްތެރިން ކަމަށްވާ، އިންޓަނޭޝަނަލް ކޯޗިން އެންރިޗްމަންޓް ސެޓިފިކެޓް ޕްރޮގްރާމް (އައިސީއީސީޕީ)ގެ ފަރާތްތަކުން، ސްޕޯޓްސް މިނިސްޓްރީ، މޯލްޑިވްސް އޮލިމްޕިކް ކޮމިޓީ، ކޮމިޝަނާ އޮފް ސްޕޯޓްސް، ސްޕޯޓްސް ކައުންސިލް އަދި އެޑިއުކޭޝަން މިނިސްޓްރީގެ އެކި ފަރާތްތަކާ އެކު ބޭއްވި ބައްދަލުވުމެވެ.
ކުޅިވަރުގެ ދުރު ރާސްތާ ޕްލޭނެއް، 20 އަހަރަށް ހާއްސަކޮށް ފަރުމާކުރާނެ ކަމަށް، ސްޕޯޓްސް މިނިސްޓަރު، އަބްދުﷲ ރާފިއު (ރާއްޕެ) އިއުލާނުކުރެއްވީ، މޯލްޑިވްސް އޮލިމްޕިކް ކޮމިޓީ (އެމްއޯސީ) އިން ޑިސެމްބަރު މަހު ބޭއްވި އެތުލީޓްސް ފޯރަމްގައި، އެތުލީޓުންނާ މުހާތަބުކޮށް ވާހަކަ ދެއްކެވިއިރު އެވެ.
ސްޕޯޓްސް މިނިސްޓަރު ވިދާޅުވީ، މިއީ ރާއްޖޭގެ އެކި ކަންކޮޅުތަކުގައި ތިބި އެތުލީޓުންގެ މުސްތަގުބަލަށްޓަކައި ކުރެވޭ މުހިންމު މަސައްކަތްތަކެއްގެ ފެށުމަށް ވެގެންދާނެ ކަމަށެވެ.
