ރައީސް މުއިއްޒު މިފަދައިން ވިދާޅުވީ ކޮޅުމަޑުލު ދިޔަމިގިލީ ކައުންސިލާއި އަންހެނުންގެ ތަރައްގީއަށް މަސައްކަތްކުރާ ކޮމިޓީއާ އެކު ދިޔަމިގިލި ކައުންސިލްގެ އިދާރާގައި އޮތް ބައްދަލުވުމުގައި ދެއްކެވި ވާހަކަފުޅުގައި އެވެ.
މި ބައްދަލުވުމުގައި ކައުންސިލްގެ ފަރާތުން ވަނީ ރަށަށް ބޭނުންވެފައިވާ ކަންތައްތަކާއި، ރަށުގެ ރައްޔިތުންނަށް ކުރިމަތިލާންޖެހިފައިވާ ބައެއް ގޮންޖެހުންތަކާއި، ދިޔަމިގިލީގެ ތަރައްޤީއަށް ބޭނުންވާ ކަންކަން ހިއްސާކުރައްވާފަ އެވެ.
އެގޮތުން މަޑިފުއްޓާ ދިޔަމިގިލި ކޯޒްވޭއަކުން ގުޅާލުމާއި، މެދަފުއްޓާ ދިޔަމިގިލި ގުޅާލުމާއި، މަގުތައް ހެދުމާއި، މަތިދޫ ދިޔަމިގިލީގެ އިޚްތިސާސްގެ ތެރެއަށްލުމަށް ބޭނުންވާކަމަށާއި، އެމްއެންޑީއެފް ގެ ޕޯސްޓެއް އެރަށުގައި ގާއިމުކުރުމަށް ބޭނުންވާކަމަށާއި، ރަށުން އޭޓީއެމްގެ ޚިދުމަތް ލިބެން ބޭނުންވާކަމަށާއި، ސިއްހީ މަރުކަޒަށް އެކްޓެންޝަން ބޭނުންވާ ކަމަށް ބުނެފަ އެވެ.
އަދި ރަށުގައި ފަށާފައިހުރި މަޝްރޫޢުތައް ކުރިއަށް ނުދިއުމުގެ ސަބަބުން ރަށުގެ ރައްޔިތުންނަށް ކުރިމަތިވާ ގޮންޖެހުންތައް ކައުންސިލުން ރައީސްއާ ހިއްސާކުރެއްވި އެވެ.
ކައުންސިލުން ފާހަގަކުރެއްވި ކަންކަމާއި ގުޅޭ ގޮތުން ރައީސް ވިދާޅުވީ، ރަށުގެ ރައްޔިތުންނަށް ބޭނުންވެފައިވާ ކަންކަން ސަރުކާރުގެ ކަމާއި ގުޅުން ހުރި މުއައްސަސާތަކާއި ގުޅިގެން ކުރިޔަށް ގެންދެވުމަށް މަސައްކަތް ކޮށްދެއްވާނެ ކަމަށެވެ. އަދި ރަށުގެ މަގުތައް ހެދުން ފަދަ ކަންކަން އަވަހަށް ކުރިއަށްގެންދިއުމަށް މަސައްކަތް ކޮށްދެއްވާނެކަމުގައި ވިދާޅުވި އެވެ.
ދިޔަމިގިއްޔަކީ މިއަދު ރައީސް ކޮޅުމަޑުލުގެ ބައެއް ރަށްރަށަށް ފެއްޓެވި 3 ދުވަހުގެ ދަތުރުފުޅުގެ ތެރެއިން ދެވަނަ މަންޒިލެވެ. މި ދަތުރުފުޅުގައި އެމަނިކުފާނުގެ އަރިހުގައި ސަރުކާރުގެ މަތީފަންތީގެ ވަފުދެއް ބައިވެރިވެވަޑައިގަންނަވަ އެވެ.
