މިއަދު ކިނބިދޫ ރައްޔިތުންނާ ބައްދަލު ކުރައްވާ ވާހަކަފުޅު ދައްކަވަމުން ރައީސް ވިދާޅުވީ މި ސަރުކާރުން އެ ރަށުގެ ރައްޔިތުންގެ އުންމީދުތައް ހަގީގަތަކަށް ހަދައިދޭނެކަމަށާއި ތަރައްގީ ބައްޓަން ކުރުމުގައި ޓްރާންސްޕޯޓު ނިޒާމަކީ ވަރަށް މުހިންމު ރޯލެއް ކުޅޭ ކަމެއް ކަމަށާއި އެ ގޮތުން އެއް ރަށުން އަނެއް ރަށަށް އަދި އެއް އަތޮޅުން އަނެއް އަތޮޅަށް ފަސޭހަކަމާ އެކު ދަތުރުކުރެވޭނެ ނިޒާމެއް ބައްޓަން ކުރަން އެބަޖެހޭ ކަމަށެވެ.
ދުނިޔޭގެ ތަރައްގީވެފައިވާ ގައުމުތައް ތަރައްގީވަމުން އައިސް ފައިވަނީ މަގުތަކާއި ބްރިޖުތައް ހަދާއިގެން ކަމަށާއި ކިނބިދޫ ރައްޔިތުން އެންމެ ބޭނުންވާ އެއް ކަންތައް ކަމުގައިވާ ކިނބިދޫ އާއި ވޭމަންޑޫ އާއި ކޯޒްވޭ އަކުން ގުޅިގެން ދިއުން ކަމަށާއި އެކަން ޔަގީން ކަމާ އެކު ހާސިލް ކޮށްދޭނެކަމަށް ރައީސް ވިދާޅުވި އެވެ.
މީގެ އިތުރުން ވެސް ކައުންސިލްތަކަށް ކަނޑައަޅާފައިވާ އިހްތިސާސްގެ ދަށުން ރަށްރަށް ހޯދައި، މާލީ ބާރުވެރިކަން ހޯދުމަށް ސަރުކާރުން ހުޅުވާލާފައިވާ ފުރުސަތުގެ ދަށުން ކިނބިދޫއަށް ވެސް އެ ފުރުސަތުތައް ހޯދުމުގެ މަގުފަހިވެފައިވާ ކަމަށާއި، އެކަންކަމުގައި ސަރުކާރުގެ އެއްބާރުލުން ލިބިގެންދާނެކަމުގެ ޔަގީންކަން ރައީސް ދެއްވިއެވެ. އަދި ރާއްޖޭގެ އިގުތިސާދީ ހާލަތު މިހާރު އޮތްގޮތުން ރަށުގެ ތަރައްގީއަށް ބޭނުންވާ މަޝްރޫއުތައް އެންމެ އިސްކަންދޭ ތަރުތީބުން އަލުން ތަރުތީބު ކުރުމުގެ މުހިންމުކަން އެމަނިކުފާނު ފާހަގަ ކުރެއްވި އެވެ.
