ތ. އަތޮޅަށް ރައީސް މުއިއްޒު ކުރައްވަމުންގެންދަވާ ދަތުރުފުޅުގައި ކިނބިދޫއަށް މިއަދު ވަޑައިގެން އެ ރަށު ރައްޔިތުންނާ ބައްދަލު ކުރައްވާ ވާހަކަފުޅު ދައްކަވަމުން ރައީސް ވިދާޅުވީ ޓްރާންސްޕޯޓު ނިޒާމަކީ ވަރަށް މުހިންމު ރޯލެއް ކުޅޭ ކަމެއް ކަމަށާއި އެ ގޮތުން އެއް ރަށުން އަނެއް ރަށަށް އަދި އެއް އަތޮޅުން އަނެއް އަތޮޅަށް ފަސޭހަކަމާ އެކު ދަތުރުކުރެވޭނެ ނިޒާމެއް ބައްޓަން ކުރަން އެބަޖެހޭ ކަމަށެވެ.
"މި ސަރުކާރުން ކިނބިދޫގެ ރައްޔިތުންގެ އުންމީދުތައް ހަގީގަތަކަށް ހަދައިދޭނެ. ތަރައްގީ ބައްޓަން ކުރުމުގައި ޓްރާންސްޕޯޓު ނިޒާމަކީ ވަރަށް މުހިންމު ރޯލެއް ކުޅޭ ކަމެއް. ކިނބިދޫ ރައްޔިތުން އެންމެ ބޭނުންވާ އެއް ކަމަކީ ކިނބިދޫ އާއި ވޭމަންޑޫ، ކޯޒްވޭ އަކުން ގުޅާލުން. އެކަން ހަގީގަތަކަށްވާނެ. ޔަގީންކަމާއެކު އެކަން ހާސިލް ކޮށްދޭނަން،" ރައީސް ވިދާޅުވި އެވެ.
ކިނބިދޫ ރައްތިޔުންނާ ބައްދަލު ކުރައްވާ ވާހަކަފުޅު ދައްކަވަމުން ރައީސް އިތުރަށް ވިދާޅުވީ ތަރައްގީގެ ކަންކަމުގައި ތަރުތީބެއް ކަނޑައަޅައިގެން ނޫނީ ކަންކަން ނުކުރެވޭނެ ކަމަށާއި ދެމެހެއްޓެނެވި ތަރައްގީއެއް ގާއިމު ކުރުމަށް ޓަކައި މިހާރު ރާއްޖެ ވެއްޓިގައި އޮތް އިގްތިސާދީ މިއަނދަވަޅުން އަރައިގަތުން ވަރަށް މުހިންމު ކަމަށާއި ރައްޔިތުންނަށް ކަންކަން ކޮށްދޭނީ ހަގީގީ މާނާއިގައި ރައްޔިތުންނަށް ފައިދާވާނެ ގޮތަކަށް ބަލައިގެން އިހްލާސްތެރިކަމާ އެކު ކަމަށެވެ.
