އެމަނިކުފާނު މިހެން ވިދަޅުވީ މިއަދު ފާހަގަކުރަމުންދާ ޝަހީދުންގެ ދުވަހުގެ މުނާސަބަތުގައި ދިވެހި ޤައުމާ މުހާތަބު ކުރައްވާ ދެއްކެވި ވާހަކަފުޅުގައެވެ.
އަލި ރަސްގެފާނުގެ މަތިވެރި ޖިހާދުގެ އިބްރަތްތެރި ވާހަކަ ތަފްސީލުކޮށް ކިޔާ ދެއްވާ ރައީސް ވިދާޅުވީ އަދުގެ ދުނިޔޭގައި އަމިއްލަ ފަސްގަނޑު، އެ ބައެއްގެ އަތުގައި ނެތް ޤައުމުތައް އުޅޭ ހާލު އަބަދާ އަބަދު އެބަ ފެންކަމަށެވެ. އަދި ފަލަސްޠީނަކީ އޭގެ މިސާލެއްކަމަށް ސިފަކުރައްވަމުން ރައީސް ވިދާޅުވީ އެފަދަ ދުވަހެއް މި އަމާންކަމުގެ ސުވަރުގެއިން ދެކެން ނޭދޭކަމަށެވެ.
ރައީސް ވިދާޅުވީ ޢަލީ ރަސްގެފާނުގެ ޖިހާދު، އަދުގެ ސިޔާސީ ފަރާތްތަކާ އެބަ މުހާތަބުކުރާކަމަށެވެ. ބޭރުގެ ދަހިވެތި ބާރުތަކުގެ ފައިބުޑަށް ތިރިނުވާން އެބަ ގޮވާލާކަމަށާއި ދިވެހީންގެ ސަލާމަތް ދިވެހީން ހޯދަން އެބަ ގޮވާލާކަމަށްވެސް ރައީސް ވިދާޅުވިއެވެ. އަދި އަލީ ރަސްގެފާނުގެ ޖިހާދު، މީޑިޔާއާ އެބަ މުހާތަބުކުރާކަން ފާހަގަކުރައްވަމުން ރައީސް ވިދާޅުވީ މީޑއާތަކުންވެސް ދޮގު ހަބަރުތައް ފެތުރުން ހުއްޓާލަން ޖެހޭކަމަށެވެ.
ކޮންމެ އަހަރެއްގެވެސް ޝައުބާންމަހުގެ 1 ވަނަދުވަސް ފާހަގަކުރަމުން އަންނަނީ ޝަހީދުންގެ ދުވަހުގެ ގޮތުގައެވެ. މިދުވަސް ފާހަގަކުރަނީ ދިވެހި ޤައުމާއި މިނިވަންކަންމުގެ ދިފާއުގައި ހަނގުރާމަކުރައްވަނިކޮށް އައްސުލްޠާން ޢަލީ 6 ވަނަ ސިރީ އައުދަ ސިޔާކަ ކައްތިރި ބަވަނަ މަހާރަދުން ނުވަތަ އަލިރަސްގެފާނު ޝަހީދުވެދައިގެން ދުވަހަށް ނިސްބަތްކޮށެވެ.
އަލި ރަސްގެފާނު ޝަހީދުވެޑައިގަތީ ހިޖްރައިން 965 ވަނަ އަހަރުގެ ޝައުބާން މަހުގެ އެއްވަނަދުވަހުއެވެ. އެ ރަސްގެފާނު ޝަހީދުވެޑައިގަތީ ޕޯޗްގީޒުންގެ އަތްދަށުން ރާއްޖެ ސަލާމަތްކުރަން ކުރެއްވި ޖިހާދުގައެވެ. ޝަހީދުވެޑައިގެން ވެއްޓުނީ މާލޭގެެ ހުޅަނގުފަރާތުގެ އަތިރިމައްޗެށެވެ. މިހާރު އަލި ރަސްގެފާނު ޒިޔާރަތް ހުރި ތަނަކީ އެ ރަސްގެފާނު ޝަހީދުވެޑައިގެން ވެއްޓުނު ތަނުގައެވެ.
