ރައީސް މިހެން ވިދާޅުވީ ރައީސް އޮފީހުން ކުރިޔަށް ގެންދާ "ރައީސްގެ ޖަވާބު"ގައި މާފުއްޓަށް ނިސްބަތްވާ އަޙްމަދު ސަމީރު ކުރި ސުވާލަކަށް ޖަވާބުދެއްވަމުންނެވެ. ސަމީރުގެ ސުވާލަކަށްވީ މާފުށީގެ އަނެއް ފަޅި ހިއްކަދޭން ވިދާޅުވި ވައުދު އެންމެ ފަހު އަހަރަށް ނުބާއްވާ އަވަހަށް ކޮށްދޭނެ ގޮތެއް ވާނެތޯއެވެ. 

އެ ސުވާލަށް ޖަވާބު ދެއްވަމުން ރައީސް ވިދާޅުވީ އެރަށު ބިން ހިއްކުމުގެ މަސައްކަތް މިއަހަރު ނުފެށުނުނަމަވެސް ވަރަށް އަވަހަށް އެ މަސައްކަތް ފައްޓަވާނެކަމަށެވެ. 

ލޯކަލް ޓްއަރިޒަމް އެންމެ ފުޅާކޮށް ރާއްޖޭގައި ކުރަމުން އަންނަ މާފުށީގައި ޑޮލަރު އޭޓީއެމް އެއް ނެތުމާއި ޑޮލަރު ލިބުން ހައްލުވާނީ ކޮން ދުވަހަކުންތޯ ވެސް ސަމީރު ވަނީ ރައީސާއި ސުވާލުކޮށްފައެވެ. 

ޑޮލަރުގެ ދަތިކަމަށާ ގުޅޭގޮތުން ޖަވާބުދެއްވަމުން ރއީސް ޑރ. މުއިއްޒު ވިދާޅުވީ، ޑޮލަރުގެ ތާށި ކަމަށް ހައްލު ލިބޭނީ އިގްތިސާދީ ގޮތުން ގެންނަން ޖެހޭ އިސްލާހުތައް ގެނެވި، އިގްތިސާދު ފުޅާވުމުންކަމަށެވެ. އެގޮތުން ބޮޑެތި މަޝްރޫއުތައް ހިނގަން ފަށައި، އިންވެސްޓްމަންޓަތައް ގިނަ ވާން ފެށުމުން ޑޮލަރުގެ ދަތިކަމަށް ހައްލު ލިބިގެންދާނެ ކަމަށް ރައީސް ވިދާޅުވިއެވެ.

ސަމީރުގެ އުފަން ރަށުގައި ޑޮލަރު އޭޓީއެމްއެއް ބެހެއްޓުމާއި ގުޅޭގޮތުންވެސް ރައީސް ވިދާޅުވީ މާފުށީގައި ޑޮލަރު އޭޓީއެމްއެއް ގާއިމް ކުރުމުގެ މަސައްކަތް މި އަހަރު ތެރޭގައި ކުރައްވާނެ ކަމަށެވެ.

ކ.މާފުށީގެ ފަޅުން 25 ހެކްޓަރުގެ ބިން 2021 ވަނަ އަހަރު ވަނީ ހިއްކާފައެވެ. އަދި 1100 ހެކްޓަރުގެ ސަރަޙައްދު ވަނީ ޙިމާޔަތްކޮށްފައެވެ. މި ޕްރޮޖެކްޓް ކުރިއަށްގެންދިޔައީ، ހިއްކި ސަރަޙައްދު މާފުއްޓާ ކޯސްވޭއަކުން ގުޅާލާގޮތަށެވެ. ހިއްކި ސަރަހައްދުން 2000 އަކަފޫޓްގެ 308 ގޯތި ވަނީ ދޫކުރަން ނިންމާފައެވެ.