އެމްއެމްއޭގެ ގަވަރުނަރު އަލީ ހާޝިމް ވެސް ބައިވެރިވެވަޑައިގެންނެވި މި ލެކްޗާ ސީރީސްގެ ފުރަތަމަ ޕްރޮގްްރާމް ކުރިއަށް ގެންގޮސްފައިވަނީ ފުވައްމުލަކުގައި ހުންނަ ޏ. އަތޮޅު ތައުލީމީ މަރުކަޒުގަ އެވެ.
އެ ލެކްޗާގައި އެ ސްކޫލުގެ ސާނަވީ ދަރިވަރުންނަށް އިގްތިސާދީ އަދި މާލީ ދާއިރާއިން ވަނީ މައުލޫމާތު ހިއްސާކުރުން ކުރިއަށް ގެންގޮސްފައިވެ އެވެ. އެގޮތުން އެ ސެޝަންގައި އަލިއަލުވާލި ބައިތަކުގެ ތެރޭގައި މާލީ ހޭލުންތެރިކަމާއި ފަހަށް ރައްކާކުރުމުގެ މުހިއްމުކަން ވެސް ހިމެނެ އެވެ.
އެމްއެމްއޭގެ އެ ލެކްޗާ ސެޝަންގައި ގަވަރުނަރު ހާޝިމް ވަނީ ބައިވެރިންނާ މުހާތަބު ކުރައްވައި، ދާއިރާގައި އޭނާގެ ތަޖުރިބާތައް ހިއްސާކޮށްފަ އެވެ. އަދި ގަވަރުނަރު ވަނީ ލެކްޗާގައި ބައިވެރިވި ދަރިވަރުންގެ ސުވާލުތަކަށް ޖަވާބު ވެސް ދެއްވާފަ އެވެ.
މީގެކުރިންވެސް އެމްއެމްއޭއިން ވަނީ މާލޭގައި މިފަދަ ޕްރޮގްރާމުތައް ހިންގާފަ އެވެ. އަދި އަތޮޅުތެރެއަށް ހާއްސަކޮށްގެން މިފަހަރު ފަށާފައިވާ މި ލެކްޗާ ސީރީޒްގެ ދަށުން ރާއްޖޭގެ ހުރިހާ އަތޮޅެއްގައި ވެސް މިފަދަ ސެޝަންތައް ކުރިއަށް ގެންދިއުމަށް އެ އޮތޯރިޓީން ވަނީ ނިންމާފަ އެވެ.