ދުނިޔޭގެ ނޫސްވެރިކަމުގެ މިނިވަންކަމުގެ ދުވަހުގެ މުނާސަބަތުގައި ދެއްވި ހިތާބުގައި މިނިސްޓަރު ވިދާޅުވީ، ސަރުކާރުން ގަބޫލު ކުރާގޮތުގައި ނޫސްވެރިކަމުގެ މިނިވަންކަމުގެ އަސާސަކީ، ސަލާމަތްތެރިކަމާއި އަދުލު އިންސާފާއި، ތަރައްގީ އަދި ހަމަހަމަކަމާއި އިންސާނީ ހައްގުތައް ވެސް ކަށަވަރުކޮށްދޭ އަސާސެއް ކަމަށެވެ.
އަސްވާޑު ވިދާޅުވީ ފާޅުގައިވިޔަސް އަދި ސިއްރުގައިވިޔަސް ނޫސްވެރިންނަށް އިންޒާރުދީ ނުރައްކަލަށް ހުށަހެޅުމަކީ ކުޑަކޮށް ނަގާނެ ކަމެއް ނޫން ކަމަށާއި އެގޮތަށް ދެވޭ އިންޒާރުތައް ވަރަށް ސީރިއަސްކޮށް ނަގާނެ ކަމަށެވެ.
މީގެއިތުރުން ނޫސްވެރިކަން ކުރިއެރުވުމަށް ދައުލަތުގެ ބަޖެޓުން މަގުފަހިކުރުމަށްޓަކައި ކުރަން ޖެހޭ ކަންކަން ވެސް ފުރިހަމަ ކުރަމުންދާ ކަމަށް މިނިސްޓަރު ވިދާޅުވި އެވެ.
މިނިސްޓަރު ވިދާޅުވީ ދުނިޔޭގެ ނޫސްވެރިކަމަށް ބަލާއިރު، މިއަދު ކުރިމަތިވެފައިވަނީ ދުވަހަކު ވެސް ނުދެކޭފަދަ ބިރުވެރި ނާމާން ދުވަސްތަކެއް ކަމަށެވެ.
ފަލަސްތީނުގެ ބިމަށް ވެރިވެގެންފައިވާ އިސްރާއީލުން ގާޒާގެ އާންމުންނަށް ދެމުންގެންދާ ލާއިންސާނީ ޙަލަމާތަކުގައި ކުށެއްނެތް އެތައް ހާސް ކުޑަކުދިންނާއި އަންހެނުން އަދި އާންމުންގެ އެތައް ހާސް ބަޔަކު ޝަހީދު ކުރަމުންދާއިރު އެ ހަބަރުތައް ކަވަރުކުރުމަށް ކެނޑިނޭޅި ހިތްވަރާ އެކު މަސައްކަތްކުރަމުންދާ އެތައް ނޫސްވެރިންނެއް ޝަހީދު ކޮށްލާފައިވާ ކަމަށް އޭނާ ވިދާޅުވި އެވެ.
އިންފޮމޭޝަން އެންޑް އާޓްސް މިނިސްޓަރު އިބްރާހިމް ވަހީދު (އަސްވާޑް)
މީޑިއާތަކަށް ދޭ އިންޒާރުތައް ކުޑަކޮށް ނަގައި، ދޫކޮށްނުލާނެ ކަމަށް މިނިސްޓަރު މިއަދު ވިދާޅުވި އިރު ރާއްޖޭގެ ދެ ޓީވީ ޗެނަލެއްގައި ރޯކޮށްލާނެ ކަމަށް ބުނެ މި ފަހުން ވަނީ ފޮރުވިގެން ތިބި ބަޔަކު އިންޒާރުގެ މެސެޖުތަކެއް ފޮނުވައިފަ އެވެ.
މީގެ އިތުރުން ދުނިޔޭގެ ކަންކޮޅުތަކުގައި ނޫސްވެރިކަމުގެ މިނިވަންކަން އޮތް މިންވަރު ވަޒަންކޮށް، ރިޕޯޓާސް ވިތައުޓް ބޯޑާސް އިން ކޮންމެ އަހަރަކު އަދާހަމަކުރާ "ވޯލްޑް ޕްރެސް ފްރީޑަމް އިންޑެކްސް" ގައި މިއަހަރު ރާއްޖެ ހަ ދަރަޖަ ފަހަތަށް ޖެހި، ނޫސްވެރިކަން ކުރަން އުނދަގޫ ގައުމުތަކުގެ ލިސްޓުގައި ވެސް ރާއްޖެ ވަނީ ހިމެނިފަ އެވެ.
- އިތުރަށް ކިޔާލަން: ނޫސްވެރިކަން ކުރަން އުނދަގޫ ގައުމުތަކުގެ ލިސްޓުގައި ރާއްޖެ ހިމެނިއްޖެ
