ދެކުނުގެ ރަށްތަކަށް ކުރައްވާ ދަތުރުފުޅުގައި ރައީސް މުއިއްޒު ގައްދޫއަށް ވަޑައިގަތީ މިއަދު ހެނދުނުއެވެ. އެރަށަށް ވަޑައިގެން ރައީސް ރައްޔިތުންނާއި ބައްދަލުކުރެއްވުން އޮތީ ގދ އަތޮޅު މަދަރުސާގައެވެ. މި ބައްދަލުވުމަށް ރައްޔިތުން ނުކުތުމަށް ގޮވާލާ ގައްދޫ ކައުންސިލުން ކުރި އިއުލާންކޮށް ގެޒެޓްގައިވެސް ވަނީ ޖަހާފައެވެ.
ރައީސް ވަޑައިގަންނަވާތީ ބައްދަވުމަށް ނުކުތުމަށް ގޮވާލި އިއުލާން
ރަށު ރައްޔިތުންނާއި ބައްދަލުކުރައްވަމުން ގދ. ގައްދޫގައި ކައުންސިލަރުންގެ އެއްބާރުލުން ނުލިބުނުކަން ފާހަގަކުރައްވާ އެކަމުގެ ހިތްހަމަނުޖެހުން ވަނީ ފާޅުކުރައްވާފައެވެ. ރައީސް ވިދާޅުވީ އެމަނިކުފާނު ބައިވެރިވި ޖަލްސާގައި ފުރަތަމަ ވާހަކަދައްކަންވެސް އޮތީ ރަށު ކައުންސިލްގެ ރައީސްކަމަށެވެ. އަދި އެކަން އެޖެންޑާކުރަނީވެސް ކައުންސިލްގެ މަޝްވަރާ ހޯދުމަށްފަހުކަން ރައީސް ފާހަގަކުރެއްވިއެވެ.
ރައީސް ވިދާޅުވީ މިކަން ފާހަގަކޮށްލީ ކުރިމަތީގައި ކުރިޔަށް އިންތިހާބެއް އޮވެ ރައްޔިތުން އަތަށް ވޯޓް ކަރުދާސްކޮޅެއް އަންނާނެތީކަމަށެވެ.
ރައީސް މުއިއްޒު ވިދާޅުވީ އެމަނިކުފާނު މިހާރު ކުރައްވަމުން ގެންދާ ދަތުރުފުޅުގައި ހުރިހާ ކައުންސިލުންވެސް އެމަނިކުފާނާ ބައްދަލުކުރައްވަމުން ގެންދަވާކަމަށެވެ. އެގޮތުން ސަރުކާރާއި ހިޔާލު ތަފާތު އެމްޑީޕީގެ ކައުންސިލަރުންވެސް ބައްދަލުވުންތަކުގައި ބައިވެރިވިކަން އެމަނިކުފާނު ފާހަގަކުރެއްވިއެވެ.
