އަމީރު މިހެން ވިދާޅުވެފައި މިވަނީ ގދ. ފަރެސްމަތޮޑާއަށް ރައީސް މުއިއްޒު އިއްޔެ ވަޑައިގެން ދެއްކެވި ވާހަކަފުޅުތަކާއި ގުޅިގެންނެވެ. ފަރެސްމާތޮޑާގައި ވާހަކަދައްކަވަމުން ރައީސް މުއިއްޒު ވިދާޅުވީ އެމަނިކުފާނު ވެރިކަމާއި ހަވާލުވެޑައިގެން އިރު ދިވެހިން ކުންފުނިތަކަށް ކުރީ ސަރުކާރުން ނުދައްކާ 9 ބިލިއަން ރުފިޔާ އޮތްކަމަށެވެ. އަދި ބޭރުގެ ދަރަނީގެ ގޮތުގައި 120 ބިލިއަން ރުފިޔާ ހުރިކަމަށްވެސް ރައީސް މުއިއްޒު ވަނީ ވިދާޅުވެފައެވެ.
ރައީސް މުއިއްޒުގެ މި ވާހަކަތަކުގެ ވީޑިއޯ ކޮޅެއް ރީޕޯސްޓްކުރައްވާ އަމީރު ވިދާޅުވީ 2023ވަނަ އަހަރު ނިމުނުއިރު ދަޢުލަތުގެ ބޭރުގެ ދަރަނީގެ ޖުމްލައަކީ 51.1 ބިލިއަން ރުފިޔާކަމަށެވެ. މި 51 ބިލިއަން އަކީ ސިދާ ދައުލަތުން ބޭރުގެ ފަރާތްތަކުން ނަގާފައިވާ 37.3 ބިލިއަން ރުފިޔާގެ އިތުރުން ދަޢުލަތުން ސޮވްރިންގ ގެރެންޓީދީގެން ނަގާފައިވާ 13.7 ބިލިއަން ރުފިޔާ ހިމެނޭހެން ޖުމްލަ އަދަދުކަމަށްވެސް އަމީރު ވިދާޅުވިއެވެ.
އަދި މިދިޔަ ސަރުކާތު ހަވާލުވިއިރުވެސް އެތައް ބިލިއަން ރުފިޔާގެ ބިލް ޕޭ ނުކޮށް ހުރިކަމަށާއި އެވާހަކަތައް އޭރު ކޮންމެ މިނިސްޓްރީއަކުން ދައްކާފައި ނުވާކަމަށެވެ.
ފަރެސްމާތޮޑާ ރައްޔިތުންނާއި ބައްދަލުކުރައްވާ ވާހަކަ ދައްކަވަމުން ރައީސް ވިދާޅުވީ ރާއްޖޭގެ މާލީ ހާކަތު މިވަގުތު އޮތްގޮތުން ސަރުކާރު އޮފީސްތަކާއި ކުންފުނިތަކުން ކޮންމެހެން ކުރަންޖެހޭ ޒަރޫރީ ހަރަދުތައް ނޫނީ ނުކުރަން އަންގަވާފައިވާކަމަށެވެ. ދައުލަތުން ދިވެހި ކުންފުނިތަކާއި އާއްމު ފަރުދުންނަށް ދައްކަންޖެހޭ 9 ބިލިއަން ރުފިޔާގެ ދަރަނި އެބައޮތްކަމަށާއ އެ ފައިސާތައް މިސަރުކާރު ދައްކަމުން ގެންދަވާކަމަށްވެސް ރައީސް މުއިއްޒު ވިދާޅުވިއެވެ.
