މި މައްސަލަ މަޖިލީހުގެ މިއަދުގެ ޖަލްސާއަށް އެމްޑީޕީގެ ފަރާތުން ހުށަހެޅުއްވީ ފުވައްމުލަކު މެދު ދާއިރާގެ މެންބަރު ހުސައިން މުހައްމަދު ދީދީ އެވެ. މައްސަލަ މަޖިލީހުން ބަލައިގެންފައި ވަނީ 22 މެންބަރުންގެ ވޯޓާ އެކުގައި އެވެ.

މިދިޔަ ސަރުކާރުން ފުލުހުން އަދި ސިފައިންގެ މުސާރަ މި އަހަރުގެ ޖެނުވަރީ މަހު ބޮޑު ކުރަން ނިންމާ އޭގެ އޮނިގަނޑުތަކެއް ހާމަކުރި ނަމަވެސް ޕޭ ކޮމިޝަނުން އެ ދެ އިދާރާގެ މުސާރައިގެ އޮނިގަނޑަށް ބަދަލު ގެންނަން ނިންމާފައިވަނީ މި އަހަރުގެ މާޗު މަހު ވަނީ އިއުލާންކޮށްފައެވެ. 

ދެ އިދާރާގެ މުސާރަ ބޮޑުނުކުރެވިގެން އުޅެނީ ދައުލަތުގެ މާލީ ހާލަތު ހުރި ގޮތުން ކަމަށް ޕޭ ކޮމިޝަނުން ބުނެފައިވާ ކަމަށާއި ސިފައިންނާ ފުލުހުންގެ މުސާރަ ބޮޑުކުރެވެން އަންނަނީ މި އަހަރުގެ މާޗު މަހާ ހަމަޔަށް ދައުލަތުގެ މާލީ ހާލަތު ރަނގަޅުވުމުންކަން ޕޭ ކޮމިޝަން އިން ބުނެފައިވާ ކަމަށް އެ މައްސަލައިގައި ބުނެފައިވެ އެވެ.

ރައީސް މުއިއްޒުގެ ރިޔާސީ ވައުދުފުޅާ އެއްގޮތަށް ސިފައިންނާއި ފުލުހުންގެ މުސާރަ ބޮޑުނުކުރެވި ދިގުލައިގެންދާތީ އެ ދެ އިދާރާގެ އިތުބާރު ސަރުކާރަށް ގެއްލިދާނެކަމުގެ ކަންބޮޑުވުން ވެސް މިއަދު ހުށަހެޅި މައްސަލައިގައި ވަނީ ފާޅުކޮށްފައެވެ.

ރައީސް ޑރ. މުއިއްޒު ވިއުދުވެވަޑައިގެންފައި ވަނީ އެ ދެ އިދާރާގެ މުސާރަ 2 ގުނައަށް ބޮޑުކޮށް ދޭނެ ކަމުގަ އެވެ.