ރައީސް ޑރ. މުއިއްޒު ގއ. އަތޮޅަށް ކުރައްވާ ދަތުރުފުޅުގެ ތެރެއިން ކޮލަމާފުއްޓަށް ވަޑައިގެން ބޭއްވި ޖަލްސާގައި ވާހަކަފުޅު ދައްކަވަމުން އެ މަނިކުފާނު ވިދާޅުވީ، ގިނަ ތަރައްގީގެ މަޝްރޫއުތައް ހިންގޭނީ ސަރުކާރުގެ އިގްތިސޯދީ ސިޔާސަތުތަކައް ތާއީދުކުރާ ރައްޔިތުންގެ މަޖިލިހެއް އޮވެގެން ކަމަށެވެ.
ރައީސް ވިދާޅުވީ ބައެއް ދާއިރާތަކުގައި ވޯޓުލުމުގައި ބަލަނީ ޒާތީ، އާއިލީ ނުވަތަ ޕާޓީ ވިސްނުމަށް ކަމަށެވެ. ނަމަވެސް ސަރުކާރުން އިގްތިސޯދީ ވަރުގަދަ ފިޔަވަޅުތަކެއް ވެސް އަޅާފައިވާ މި ވަގުތުގައި ގޯސް ވިސްނުމެއްގައި ވޯޓު ދީފި ނަމަ، އޭގެ ގެއްލުން ރައްޔިތުންގެ ތަރައްގީގެ މަޝްރޫއުތަކަށް ކޮށްފާނެ ކަމުގައި އެ މަނިކުފާނު ފާހަގަ ކުރެއްވި އެވެ.
މީގެއިތުރުން ރާއްޖޭގެ ދުސްތޫރީ ނިޒާމު އޮންނަ ގޮތުން، ސަރުކާރުން ކުރަން ބޭނުންވާ ކަންކަން ހުއްޓުވުމުގެ ބާރު މަޖިލިހަށް އޮންނަ ކަމަށް ރައީސް ވިދާޅުވި އެވެ. އެހެންކަމުން މި ހައްސާސް ދަނޑިވަޅުގައި ރައްޔުތުންނަށް ލިބިފައި އޮތް ބާރުގެ ބޭނުން ޒިންމާދާރު ގޮތުގައި ކޮށް، ސަރުކާރުގެ ކެންޑިޑޭޓުންނަށް ވޯޓު ދެއްވުމަށް ރައީސް އެދިވަޑައިގަތެވެ.
ސަރުކާރަށް މަޖިލިހުގެ މެޖޯރިޓީ ނެތުމުގެ ސަބަބުން ވޭތުވެދިޔަ ތިން މަސް ދުވަހުގެ ތެރޭގައި ގިނަ ދަތިތަކެއް ދިމާވަމުން ގޮސްފައިވާ ކަމަށާއި، މަޖިލިހުގެ މެޖޯރިޓީ ލިބިއްޖެ ނަމަ ތަރައްގީގެ މަޝްރޫއުތައް ހިންގުމަށް ފަސޭހަ ވެގެންދާނެ ކަމަށް ވެސް ރައީސް ވަނީ ވިދާޅުވެފަ އެވެ.
