ތިން ދުވަހުގެ މުއްދަތަކަށް ކުރިއަށްގެންދިޔަ މި ޕްރޮގްރާމް ނިންމުމުގެ ރަސްމިއްޔާތުގައި ވާހަކަދައްކަވަމުން ފަހުމީ ވިދާޅުވީ ކިތަންމެ މޮޅަށް ކިޔަވައިގެން ހުއްޓަސް، އިތުބާރާ ނުލާ ކުރެވޭނެ މަސައްކަތެއް އޮންނާނެ ކަމަށް ގަބޫލު ނުކުރައްވާ ކަމަށެވެ.
އެހެންކަމުން ވެރިންނާއި އެންމެ އާދައިގެ މުވައްްޒަފުންނާ ދެމެދު ވެސް އިތުބާރު ގާއިމްކުރަން ޖެހޭ ކަމުގައި ފަހުމީ ފާހަގަ ކުރެއްވި އެވެ.
އެ ރަސްމިއްޔާތުގައި ދިވެހި ބަހާ ސަގާފަތާއި ތަރިކައާ ބެހޭ ވަޒީރު އާދަމް ނަސީރު ވިދާޅުވީ، ތަރައްގީގެ މާނަތަކަށް ބަލާއިރު އިންސާނުން އަމިއްލަ އިހުސާސުން އެންމެ ފުރަތަމަ ތަރައްގީ ދެނެގަންނަނީ ސްޓެލްކޯއިން ކަމަށެވެ.
ސްޓެލްކޯއިން ހިންގި މި ތަމްރީނު ޕްރޮގްރާމަކީ އެ ކުންފުނިން ފޯރުވައިދޭ ހިދުމަތްތަކަކީ ރައްޔިތުންނާއި ގާތުން އަދި ރައްޔިތުންނަށް ފަސޭހައިން ލިއްބައިދެވޭނެ އަދި އިތުބާރާއި ޔަގީންކަން ގާއިމްވެފައިވާ ހިދުމަތްތަކަކަށް ހެދުމަށާއި، އިންޖީނުގެތަކުގެ ހިންގުން އިތުރަށް ހަރުދަނާ ކުރުމަށް ކުރިއަށް ގެންދިޔަ ޕްރޮގްރާމެކެވެ.
ޖުމްލަ 37 ބައިވެރިންނާއެކު ބޭއްވި މި ޕްރޮގްރާމްގައި ސްޓެލްކޯގެ އެކި ޑިޕާޓްމަންޓްތަކުގެ މަސައްކަތްތަކާއި، ހިންގުމުގެ ހުނަރުތަކާއި ގުޅޭގޮތުން ސެޝަންތައް ވަނީ ކުރިއަށްގެންގޮސްފަ އެވެ.
