މީހުން އާބާދުވެފައިވާ ކޮންމެ ރަށެއްގައި ފުލުހުންގެ ހިދުމަތް ގާއިމުކުރުމުގެ މަޝްރޫއުގެ ތެރެއިން، 19 ރަށެއްގައި ފުލުހުންގެ ހިދުމަތް ގާއިމުކުރެވިފައި ވާއިރު، ފުލުހުންގެ ހިދުމަތް މިހާތަނަށް ގާއިމުވެފައި ނުވާ ރަށްރަށުގައި ފުލުހުންގެ ހިދުމަތް ގާއިމުކުރުމުގެ މަސައްކަތް މެދުކެނޑުމެއްނެތި އަންނަނީ ކުރަމުންނެވެ.
އެގޮތުން، ނިމުނު އަހަރުގެ ޑިސެމްބަރު މަހު 3 ރަށެއްގައި ޕޮލިސް ޕޯސްޓު ވަނީ ހުޅުވައިފަ އެވެ. އަދި ނިމުނު ޖަނަވަރީ މަހު ވަނީ 7 ރަށެއްގައި ޕޮލިސް ޕޯސްޓު ހުޅުވައި އެ ރަށްރަށުގައި ފުލުހުން ގާއިމުވެތިބެ ހިދުމަތް ދޭންފަށާފަ އެވެ. އަ ހަމައެހެންމެ އިއްޔެ ގއ. ކޮނޑޭގައި ހުޅުވިގެން ދިޔަ ޕޮލިސް ޕޯސްޓާއެކު، މި ފެބުރުވަރީ މަހު 9 ރަށެއްގައި ވަނީ ޕޮލިސް ޕޯސްޓު ހުޅުވައި ހިދުމަތަ ދޭން ފަށައިފަ އެވެ.
ސަރުކާރުގެ ހަފުތާ 14 އިގެ ދަށުން 19 ޕޮލިސް ޕޯސްޓު ހުޅުވުމުގެ ތެރެއިން ފޮޓޯ: ޕޮލިސް
2023 ވަނަ އަހަރުގެ ޑިސެންބަރު މަހުން ފެށިގެން މި އަހަރުގެ މިހާތަނަށް ޕޮލިސް ޕޯސްޓު ހުޅުވައި ހިދުމަތްދޭން ފަށާފައިވަނީ ހއ. ފިއްލަދޫ، ހދ. ކުރިނބި، ހދ. ނެއްލައިދޫ، ށ. ޅައިމަގު، ނ. ޅޮހި، ނ. ހެނބަދޫ، ނ. މާޅެންދޫ، ނ. މިލަދޫ، ބ. މާޅޮސް، ބ. ކިހާދޫ، ބ. ކުޑަރިކިލު، ބ. ހިތާދޫ، ވ. ތިނަދޫ އަދި ވ. ފުލިދޫ، ދ. ހުޅުދެލި، ތ. ވަންދޫ، ތ. ގާދިއްފުށި، ލ. މާބައިދޫ، ގއ. ކޮނޑޭ ގައެވެ.
