ރައްޔިތުންގެ ސުވާލުތަކަށް ޖަވާބުދެއްވުމަށް ސިލްސިލާކޮށް ބާއްވާ "އަހާ" ފޯރަމްގައި މީހަކު ކުރި ސުވާލަކަށް ޖަވާބު ދެއްވަމުން ރައީސް ވިދާޅުވީ އޭސީސީން އަދިވެސް ގެދޮރުވެރިޔާ ޕޯޓަލްގެ އެކްސެސް ހައުސިން މިނިސްޓްރީއަށް ނުދޭ ކަމަށެވެ. ނަމަވެސް، ޕޯޓަލްގެ އެކްސެސް މި ހަފްތާ ދޭނެ ކަމަށް އޭސީސީން އޮތީ ބުނެފަ އެވެ.
ލިސްޓުގައި ހުރި މައުލޫމާތުތައް ބެލުމަށް ފަހު އާންމުކުރަން ސަރުކާރުން ބޭނުންވި ނަމަވެސް، ރައީސް ވިދާޅުވީ، ޕޯޓަލްގެ އެކްސެސް ނުލިބޭތީ މައުލޫމާތު ވެސް ބަލައިނުލެވޭ ކަމަށެވެ.
ރައީސް ވިދާޅުވީ ކުރިން އޮތް ސަރުކާރުން ދޭން ނިންމާފައި ހުރި ބައެއް ފްލެޓްތައް ދެން އަންނަ ސަރުކާރަކުން ނުދޭން ނިންމާފައިވެސް އެބަހުރިކަމަށެވެ. އަދި ސަރުކާރުން ހިންގާ އެންމެ ފުރަތަމަ ސޯޝަލް ހައުސިން މަޝްރޫއެއްގެ ތެރެއިން އެފަރާތްތަކަށް ފްލެޓް ލިބޭނެކަމަށްވެސް ރައީސް ވިދާޅުވި އެވެ.
ގިނަ އަދަދެއްގެ ރައްޔިތުންގެ މިހާރުގެ އެންމެ ބޮޑު އެއް ކަންބޮޑުވުމަކީ ނިމިދިޔަ ސަރުކާރުގެ ގެދޮރުވެރިޔާ ސްކީމުގެ ދަށުން ލިބުނު ފްލެޓަށް ވީނުވީއެއް ނޭނގުމެވެ. އަދި ބިންވެރިޔާ ސްކީމުގެ ދަށުން ދޫކުރި ބިންތައް ވެސް އަދި ނުލިބި އޮތުމެވެ.
ގެދޮރުވެރިޔާ ސްކީމުގެ މައްސަލަ އަދި ވެސް އޮތީ އޭސީސީއާ ހަމައިގަ އެވެ.
ބިންވެރިޔާ ސްކީމުގެ ދަށުން ގޯއްޗަށް އެދި ހުށަހެޅި 97 ޕަސެންޓު މީހުންނަށް ގޯތި ދިނުމަށް ރައީސް އިބްރާހިމް މުހައްމަދު ސޯލިހުގެ ސަރުކާރުން ނިންމި އެވެ. އެއީ 18955 މީހުންނަށް 9003 ގޯއްޗެވެ.
ބިންވެރިޔާ ސްކީމުގެ ދަށުން ފުރަތަމަ ބުރުގައި ދޫކުރާ 9003 ގޯތީގެ ތެރޭގައި ހިމެނެނީ, ހުޅުމާލެއިން ދޫކުރާ 1351 ގޯއްޗާއި, ގުޅީފަޅުން ދޫކުރާ 2219 ގޯތީގެ އިތުރުން ގިރާވަރުފަޅުން ދޫކުރާ 5433 ގޯއްޗެވެ. އެކަމަށް ހުޅުމާލެއިން 26 ހެކްޓަރު, ގުޅީފަޅުން 42 ހެކްޓަރު އަދި ގިރާވަރުފަޅުން 73 ހެކްޓަރުގެ ބިން ބޭނުންވެ އެވެ.
