ރޭގައި ރައީސް ބައްދަލު ކުރައްވާފައިވަނީ ހއ.ދިއްދޫ، ހއ.މާރަންދޫ އަދި ހއ.ތަކަންދޫގެ ކައުންސިލްތަކާއި އެވެ. ދިއްދޫ އަދި މާރަންދޫގެ ކައުންސިލްތަކާއި ރޭ ދިއްދޫ ސްކޫލްގައި ބައްދަލުކުރެއްވި އިރު ދިއްދޫގެ ކައުންސިލްތަކާއި ރައީސް ބައްދަލުކުރެއްވީ އެ ރަށު ކައުންސިލް އިދާރާގައި އެވެ.
މި ބައްދަލުކުރެއްވުންތަކުގައި ކައުންސިލްތަކުން ވަނީ ރައްޔިތުން އެންމެ ބޭނުންވާ ކަންކަން ރައީސް އާ ހިއްސާކުރައްވާފަ އެވެ. އެގޮތުން އެ ރަށްރަށުގެ މަގުތައް ތަރައްގީކުރުމާއި، ރަށުގެ ޒުވާނުންނަށް ކުޅިވަރު ކުޅުމަށް އިތުރު ވަސީލަތްތައް ހޯދުމަށާއި، ދަތުރުފަތުރުގެ ނިޒާމު ހަރުދަނާ ކުރާނޭ ގޮތެއް ރައްޔިތުން ބޭނުންވާ ކަމަށް އެ ކައުންސިލްތަކުން ވަނީ ރައީސް އަށް ވަނީ ދަންނަވާފައި އެވެ.
ދިއްދޫ ކައުންސިލުން ވަނީ ރަށުގެ ހޮސްޕިޓަލް ރަނގަޅު ފެންވަރަކަށް ގެންދަން ބޭނުންވާކަމަށާއި، ދިއްދޫ އިންޖީނުގޭގެ ހާލަތު ވަރަށް ދަށްކަމުގައި ފާހަގަކުރައްވައި އެކަމަށް އަވަސް ހައްލެއް ބޭނުންވާކަމަށް ކައުންސިލުން ރައީސްއަށް ދެންނެވި އެވެ.
ކައުންސިލުންތަކުން ވަނީ މި ސަރުކާރަށް ފުރިހަމަ އެއްބާރުލުން ދެއްވާނެކަން ފާހަގަކުރައްވައި މިހާރު ފަށާފައިހުރި މަޝްރޫޢުތައް ކުރިއަށް ގެންދިއުމަށް އެދިވަޑައިގެންފައެވެ. މީގެ އިތުރުންވެސް މުސްތަގުބަލުގައި ރަށްތަކަށް ތަރައްގީއަށް ބޭނުންވާ ކަންކަންވެސް ކައުންސިލުތަކުން ރައީސުލްޖުމްހޫރިއްޔާއާ ހިއްސާކުރައްވާފަ އެވެ.
ހއ. ރައީސް ދިއްދޫ ކައުންސިލް އަދި އ.ތ.މ ކޮމިޓީގެ މެންބަރުންނާ ބައްދަލުކުރެއްވުން
މި ބައްދަލުކުރެއްވުމުގައި ތަކަންދޫ ކައުންސިލުން ވަނީ ފެނާއި ނަރުދަމާގެ މަސައްކަތް ވީއެންމެ އަވަހަކަށް ނިންމަވައިދެއްވުމަށް އެދިވަޑައިގެންފައެވެ. އަދި ކޮމިއުނިޓީ ސެންޓަރެއްވެސް ތަކަންދޫއަށް ވަރަށް މުހިންމުކަމުގައި ކައުންސިލުން ފާހަގަކުރެއްވިއެވެ. ހަމަ އެއާއެކު، ކުނި މެނޭޖުކުރުމަށް ސަރުކާރުގެ އެއްބާރުލުން ބޭނުންވާކަމުގައި ފާހަގަކުރައްވައި، ވޭސްޓް މެނޭޖްމަންޓް ސެންޓަރެއް ގާއިމުކޮށްދެއްވުމަށް ކައުންސިލުން އެދިވަޑައިގެންނެވި އެވެ.
މީގެ އިތުރުން ބަޖެޓުގެ ދަތިކަމުގެ ސަބަބުން ކުރިމަތިވާ ގޮންޖެހުންތައް ކައުންސިލުން ހިއްސާ ކުރައްވާފައިވެ އެވެ. އަދި ރަށުގެ އާމްދަނީ އިތުރުކުރުމަށް ތަކަންދޫގެ އިހުތިސާސުގެ ތެރެއަށް ރަށެއް ގެންނަން ބޭނުންވާކަމުގައި ކައުންސިލުން ފާހަގަކުރެއްވި އެވެ.
މި ބައްދަލުކުރެއްވުމުގައި މާރެންދޫ ކައުންސިލުން ފާހަގަކުރެއްވި ކަންކަމުގެ ތެރޭގައި، ކަރަންޓާއި، ލެބޯޓްރީ އަދި ބޭންކުގެ ހިދުމަތްތައް އިތުރަށް ތަރައްގީކުރުމަށް ބޭނުންވާކަން ހިމެނެ އެވެ. އަދި ކުޅިވަރުގެ ދާއިރާ ހަރުދަނާކުރުމަށް ބޭނުންވާ ކަންކަން ކައުންސިލްގެ ފަރާތުން ރައީސުލްޖުމްހޫރިއްޔާއާ ހިއްސާކުރެއްވި އެވެ.
ރައީސް ހއ. މާރަންދޫ ކައުންސިލް އަދި އ.ތ.މ ކޮމިޓީގެ މެންބަރުންނާ ބައްދަލުކުރެއްވުން
މީގެ އިތުރުން ކައުންސިލް އިދާރާއަށް އާ އިމާރާތެއް ބޭނުންވާކަމަށާއި، މާރަންދޫފަރު، މާރަންދޫގެ އިހުތިސާސްގެ ތެރެއަށްލުމަށް ރަށުގެ އިސްރަށްވެހިން ބޭނުންވާކަމުގައި ކައުންސިލުން ފާހަގަކުރެއްވި އެވެ. ހަމަ އެއާއެކު ބަނދަރުގެ މަޝްރޫޢު ބާރަށް ކުރިއަށްގެންދަން ބޭނުންވާކަމުގައިވެސް ކައުންސިލުން ދެންނެވި އެވެ.
މާރަންދޫ އަންހެނުންގެ ތަރައްގީ (އ.ތ.މ) އަށް މަސައްކަތްކުރާ ކޮމިޓީންވަނީ އެކަނބަލުންނަށް މަސައްކަތްކުރެވޭނެ މާހައުލެއް ބޭނުންވާކަމުގައި ފާހަގަކުރައްވާފައެވެ. އަދި އ.ތ.މ. ކޮމިޓީތަކަށް ތަމްރީނުގެ ފުރުސަތުތައް ފަހިކޮށްދެއްވުމަށްވެސް އެދިވަޑައިގެންނެވި އެވެ. މީގެ އިތުރުންވެސް އ.ތ.މ. ކޮމިޓީގެ މެންބަރުންނަށް ކުރިމަތިވާ ގޮންޖެހުންތައް ރައީސް އާ ހިއްސާކުރެއްވި އެވެ.
ރޭގެ ބައްދަލުކުރެއްވުންތަކުގައި ރައީސް ވިދާޅުވީ އެމަނިކުފާނު ވައުދުވެވަޑައިގެންފައިވާ ހުރިހާކަމެއް ކޮށްދެއްވާނެކަމުގަ އެވެ. އަދި ކައުންސިލުތަކުން ފާހަގަކުރެއްވި ކަންކަން ކޮށްދެވެން އޮތް ގޮތްތައް ބައްލަވައި އެކަންކަން ކުރިއަށް ގެންދަވާނެކަމުގައިވެސް އެމަނިކުފާނު ވިދާޅުވިއެވެ. މި ބައްދަލުކުރެއްވުމުގައި ބައިވެރިވެވަޑައިގެންނެވި ވަޒީރުންވަނީ ކައުންސިލުން ފާހަގަކުރެއްވި ކަންކަމުގައި ސަރުކާރުން ކުރައްވަމުން ގެންދަވާ މަސައްކަތްތަކުގެ އެންމެ ފަހުގެ މަޢުލޫމާތު ހިއްސާކުރައްވާފަ އެވެ.
ރޭ އޮތް ދިއްދޫ ކައުންސިލް ބައްދަލުވުމުގެކުރިން ރައީސް ވަނީ ދިއްދޫ ކައުންސިލް އިދާރާގެ އާ އިމާރަތް ހުޅުވައިދެއްވާފަ އެވެ. އަދި މިއަދު ދިއްދޫ ރައްޔިތުންނާއި ބައްދަލުކުރައްވަން ބާއްވަވާ ޖަލްސާ މިހާރު ދަނީ ކުރިއަ ށެވެ.
